Letras novas - Asociación de Escritores en Lingua Galega

É a enfermidade. Atentado ecolóxico contra o planeta. Vertedoiros
radioactivos na Foxa Atlántica. Extinción do lobo, da balea, do oso
panda. Matadoiro de touros invidentes. Centrais nucleares. Fábricas de
celulosa. Eucaliptización. Incendios forestais. Greenpeace, Adega á fronte.
Mais, onde estás Virxe do Rocío? Porque o mar e a terra sangran, as
feridas doen e os teus seguidores parecen sentir o pudor dos covardes
agardando pola metamorfose da Piedade, mentres un neno afoga entre
lixo. Un vello con alzheimer non lembra o seu nome. Unha muller con
depresión crónica sente o gume dun coitelo no fondo do seu pozo. Unha
bala-bágoa pérdese nos ósos-carbón dunha anoréxica. Un epiléptico cae
nun profundo Déjà Vu golpeado polos cabalos da apocalipse. Unha rapaza
negra sangra cristais despois dunha malleira. Uns nenos abafan a un
home parapléxico. Dúas donas berran desencaixadas no médico de cabeceira.
Corporación dermohistérica colectiva occidental. (NON) é a enfermidade.
É a necidade fatídica. A incomprensión. O imperio da sandez. A
imprudencia (a)moral. Os ritos do NADAL bombardeando telexornais e
festas de gardar. O Papa, Cristo e a Virxe, uns beatos; o mundo, patas
arriba. Que nunca o voso corazón desfaleza nas tebras da detención.
Que nunca vos rouben a capacidade de elixir. Que sexa a liberdade o
voso ollar, o voso sentir, a liña das luces e das sombras. Eu non preciso
nin de panxoliñas nin de procesións.
* Dedicado a todos aqueles que carrexan bombas
de inocencia adulterada no tempo da “vitoria” carroñenta.
Infoxove número 20, decembro de 2007
185