Letras novas - Asociación de Escritores en Lingua Galega

Pecado mortal
É a enfermidade. Ela asolaga as vosas costas de corazón mártir no infortunio
de apreixar o patetismo sacro, ela fustiga a vosa alma coa ambrosía
enmascarada de pasos fúnebres, o vía crucis imparable, incurable
retroceso na peregrinaxe noxenta cara deuses inventados, paixón de
cristos nefastos, fúnebres, vergonza allea salvando a vosa inseguridade
ebria. Laiades por unha estatua, fanáticos dos vosos medos, frustracións
na agulla do desequilibrio. Actores da mesma peza teatral. Ku Kux Klan
da ignorancia, saetas agochadas no inferno do máis alá. É a enfermidade.
O chagas. O kala azar. O cólera. Milleiros de vítimas en América
Latina, en África, en Asia padecen o que moitos descoñecen. Conflitos
crónicos que non teñen prioridade para algúns medios de comunicación.
Distorsión e ruído. Somalia. Chad. Darfur. Nepal. Sri Lanka. Terremotos.
Tsunamis. Furacáns. Actos de violencia perpetrados contra inmigrantes
saharauís. Cemiterios en Juchitán. Soños rachados no deserto feminicida
de Tijuana. Armenia no sepulcro. Cuba na boca do arBushto puritano.
Todos eles pacientes moribundos que non posúen o rango da Irmandade
da Trinidade. Non haberá procesión. Un boliviano é menos vulnerable cá
Macarena. Un ser vivo ten menos pulsacións cá un anaco de escaiola.
Relixión incongruente. O humano reducido a migallas. Animais cos ollos
cravados na gaiola. Cardeais no consumismo idolatrado da infamia e da
detención.
184