Letras novas - Asociación de Escritores en Lingua Galega

—barato neniña, eu non vendo nada caro
para gañar uns pesos namais.
É unha moza e alguén debería sacudila
coma roupa mollada.
Cando vou saír desta cidade?
Onde metería o chisqueiro?
Gustaríame estar noutro lado?
Onde metería o chisqueiro?
Dá unha calada ou dúas.
Afógase ao correr, correr, correr, correr.
“Para cada Coldplay debe de haber un antídoto.
O reggaetón paréceme perfecto”.
Se Sara estivese dous metros máis adiante
caeríalle cuspe na diadema de flores azul e branca.
“Non sei nada de facer música
pero sei o que me gusta”.
Camiña a mesma rúa no mesmo sentido:
pode tropezar pero pode non tropezar.
Se torcese pola que sobe fixaríase no muro,
na pintada. Ugio e Giana liberdade.
Ugio e Giana, que volvan á casa. Stop G8.
“Se algún neno bosníaco fai música
vai vir dunha parte do seu corpo moi diferente”.
A adolescente Sara non vai a clases de guitarra
os martes de cinco a seis
pero súa nai paga cen euros cada trimestre.
(Vou dar unha volta por Union Square
nunca sabes a quen vas atopar por alí)
-Que escoitas agora?
-Funk das favelas. Non fan albumes, só tocan.
Leva os ollos na cabeza e o cu debaixo do rabo.
Matou ao gato para ver se era verdade que tiña máis vidas.
Non lle deu noxo coller o morcego morto coas mans e abrilo cunha coitela.
(A mareada Sara non tiña nin a máis mínima experiencia
colleu o tranvía ata a rúa corenta e sete
e cría que a levaría ao ceo)
133