Letras novas - Asociación de Escritores en Lingua Galega

Cando a Asociación de Escritores en Lingua Galega naceu no
ano 1980, canda á luz da palabra en liberdade acabada de estrear,
asentou a súa fundación en tres piares básicos: traballar a prol
da normalización do feito literario e do escritor e da escritora na
Galiza, defender e reclamar a normalización plena da lingua
galega e defender os intereses e dereitos dos socios e socias que
a compoñen.
Mais tamén hoxe comprendemos que é fundamental prendermos
a semente das letras en vós, os máis novos, os depositarios
actuais do facho da luz do saber, para así contribuírmos, desde a
nosa humildade, á vosa formación como herdeir@s das voces de
todo un tempo propio que xa foi, inzado de historia literaria, que
é o mesmo que dicir historia cultural de seu, para que o acollades
hoxe na vosa sabedoría para a súa (re)configuración de mañá, a
partir das novas apostas dialécticas, temáticas, estilísticas e retóricas
contemporáneas ao voso vivir.
Porque o mañá aínda está por construír e a mellor obra aínda
está por crear, a AELG quere ofrecerse desde aquí como unha plataforma
que actúe como proxector da creación literaria e do pensamento
reflexivo dos mozos e das mozas galegas que se alimentan
da savia das palabras do idioma de noso para o convivio consigo
propios e co mundo que os axuda a medrar.
Despois de vinte números da nova andaina da (re)estrea do
Xornal Infoxove, agradecemos moi sinceramente á Dirección Xeral
de Xuventude e Solidariedade a posibilidade de dar á imprenta o
conxunto das 58 colaboracións que para a sección “Letras Novas”
achegaron 51 escritores e escritoras, nov@s os máis deles, e ofrecermos
así a súa pluma canda a súa voz.
9
O Consello Directivo da AELG