pdf - Consello da Avogacía Galega

síndromes depresivas, os máis importantes factores contribuíntes á carga de mala saúde
a escala mundial”. 378
Máis recentemente, o secretario xeral das Nacións Unidas, na súa mensaxe emitida o
día internacional para a eliminación da violencia contra a muller, destaca que a problemática
adquiriu a necesaria atención da comunidade internacional ao ser estudada de
forma transversal nos distintos foros e ámbitos en que queda patente a súa existencia.
Así, para KOFI A. ANNAN: “A violencia contra a muller estivo na axenda da Segunda
Asemblea Mundial sobre Envellecemento, a cal recoñece que as mulleres de idade
enfrontan un risco maior de abuso físico e psicolóxico, e no Cumio Mundial sobre o
Desenvolvemento Sostible, o cal recoñeceu a importancia da eliminación de todas as
formas de violencia e discriminación en contra da muller. A Sesión Especial da Asemblea
Xeral a Favor da Infancia indicou a determinación de todas as nacións de promover todos
os dereitos humanos das nenas, incluíndo o dereito a vivir libre de coerción, prácticas
daniñas e explotación sexual”. 379
Tamén o Informe do Defensor do Pobo 380 fai referencia ás condicións en que se mostran
as vítimas da violencia habitual, mencionando como trazos da muller maltratada os
seguintes: presenta baixa autoestima; séntese culpable por ser agredida; séntese fracasada
como muller, como esposa e como nai; sente temor, pánico; sente que non ten control
sobre a súa vida; sente gran ambivalencia: sentimentos encontrados, como por
exemplo, dálle moita rabia ser agredida, pero sente que foi a súa culpa porque “o merecía”;
séntese completamente incapaz e impotente para resolver a súa situación debido a
que sempre foi controlada e dominada; é tradicionalista en canto ao fogar, a unidade
familiar e os roles sexuais femininos; foi socializada para pensar que os golpes son cousa
normal no matrimonio; cre que ninguén a pode axudar a resolver o seu problema, excepto
ela mesma; séntese responsable pola conduta do agresor; exhibe ou demostra unha
gran resistencia e unha actitude de aceptación pasiva”.
Porén, resaltouse por parte dos profesionais que atenden este tipo de vítimas que con
frecuencia mostran unha destacable fortaleza para manipular e manexar o seu ambiente,
de maneira que o incidente non lles cause a morte; abriga esperanzas irreais de que
o cambio é inminente; vólvese illada socialmente; defínese a si mesma en termos das
necesidades dos demais; posúe un alto risco de volverse adicta ás drogas ou ao alcohol;
exhibe desordes de estrés, depresións e enfermidades psicosomáticas; basea os seus
sentimentos de autovalía na habilidade de conquistar e manter un home ao seu lado;
acepta o mito da superioridade masculina; subestima o perigo da súa situación; acepta
a visión da realidade que ten o seu compañeiro; dúbida da súa propia saúde mental e
teme o estigma do divorcio.
378 Naciones Unidas. Informe sobre la Población Mundial 2000. Capítulo 5º.
http://www.unfpa.org/swp/2000/espanol/ch05.html. Rojas Marcos describe nas súas investigacións
que, ademais de serios danos físicos, a violencia familiar causa nas vítimas trastornos emocionais profundos
e duradeiros, en particular depresión crónica, baixa autoestima, atordamento afectivo e illamento
social. Rojas Marcos: Las semillas de la violencia, Espasa, Madrid, 1995, p. 34.
379 Kofi A. Annan. Mensaxe do secretario xeral das Nacións Unidas do 25 de novembro de 2002.
http://www.unfpa.org.
380 Defensor do Pobo. Informe sobre la violencia doméstica contra las Mujeres, Madrid, 1998.
O tratamento penal da violencia contra as mulleres
159