Xestion de residuos urbanos.pdf - Axencia de Ecoloxía Urbana do ...

34
En canto á actividade económica tanto o norte de Portugal como Galicia mudaron dunha actividade
esencialmente agraria e pesqueira ao desenvolvemento do sector secundario e especialmente do
sector terciario.
Isto levou consigo unha evolución da poboación asimétrica, con emigración desde o interior ás zonas
costeiras así como aos centros comarcais e ás grandes cidades, producíndose un avellentamento
das poboacións nas aldeas e nas pequenas vilas. As vilas do Eixo Atlántico foron favorecidas por esta
emigración gañando poboación a maioría delas.
Esta cadea de cambios, da actividade con fluxos migratorios do medio rural á cidade supón un cambio
no tipo de vivenda e nos hábitos de vida. Este cambio nos costumes vese reforzado polo incremento
de renda así como pola evolución na educación e pola incorporación da muller ás actividades
produtivas fóra de casa.
Como consecuencia de todo o anterior, prodúcese tamén un cambio na idade das parellas que casan
e no número de fillos; así mesmo os avances tecnolóxicos xunto a maior capacidade de compra que
permiten aproveitalos trouxeron consigo unha modificación nas pautas de compra e consumo. Todo
isto segue un proceso de retroalimentación que mantén a súa dinámica.
Os procesos sinalados no parágrafo anterior condicionan a produción de residuos, tanto na súa cantidade
como na súa tipoloxía (por exemplo, a porcentaxe de materia orgánica na composición do lixo
caeu de preto dun 50%, ou mesmo máis nalgúns casos, a un 25% nas sociedades máis avanzadas).
Ámbolos dous factores determinan os modelos de xestión e en particular os tipos máis adecuados
de tratamento.
Polo tanto calquera plan de xestión dos residuos urbanos haberá de facer unha análise da evolución
destes factores, da poboación e dos seus comportamentos, previa á toma de decisións que comprometan
os investimentos en infraestruturas por un longo período de tempo.
Todo o comentado vese reforzado nas vilas do Eixo, en particular a través dos fluxos migratorios, a
progresiva urbanización da súa poboación e os maiores crecementos das rendas dispoñibles que
como dixemos condicionan a tipoloxía e cantidade dos residuos producidos.
A climatoloxía e relevo son, pola súa banda, factores condicionantes das decisións, que temos que
ter en conta para definir sistemas de recollida, loxística de transporte e as tecnoloxías de tratamento
a empregar.
Estudos desenvolvemento sostible