Xestion de residuos urbanos.pdf - Axencia de Ecoloxía Urbana do ...

desenvolvemento sostible vol.1
No que atinxe á distribución funcional da actividade por sectores, temos como máis importantes os
seguintes:
Dentro do sector primario destaca a rama pesqueira polo elevado grado de desenvolvemento económico
que produce, de aí que exista un gran número de núcleos de poboación que teñen a esta rama
como a súa principal actividade. Cabe citar entre eles os seguintes: Vigo, Vilagarcía, Marín, Bueu,
Boiro, Noia, Muros, A Coruña, O Grove, Ribeira, Ortigueira, Burela, Foz, Ribadeo, entre outros.
A rama agraria, tamén dentro do sector primario, podemos dicir que se desenvolve principalmente
nos seguintes núcleos: O Carballiño, Ordes, Vilalba, Verín, Negreira, Santa Comba, Melide, Arzúa.
Así mesmo, cabe destacar a actividade vitivinícola cunha maior incidencia en Ribadavia, A Rúa e toda
a ribeira do Miño e do Sil.
No sector secundario destaca a rama mineira en As Pontes, a explotación de lousas en O Barco, a
construción de mobles en A Estrada e Sarria, o deseño e confección téxtil e a carpintería metálica en
Lalín, construcións mecánicas en Carballo, a industria relacionada coa manipulación do granito en
Porriño, etc.; e pola súa importancia, as industrias de transformación pesqueira e conserveiras situadas
polas Rías Baixas, a industria de construción naval que ten un notorio relevo en Vigo e Ferrol, a
industria do automóbil con asento en Vigo e a industria téxtil en A Coruña.
1.2.3.2. Conxuntura económica.
Nestes últimos anos a economía galega non foi allea á contracción da actividade derivada da crise
económica que afecta tanto a España como ao conxunto da Zona Euro e incluso ao resto da economía
internacional.
A desaceleración da actividade económica en España, tras sete trimestres consecutivos, cunha recesión
que comezou a principios do 2008, mostra unha leve melloría no primeiro trimestre de 2010,
cunha taxa de crecemento intertrimestral do 0,1%. Nembargante desde unha perspectiva interanual,
o ritmo de crecemento da actividade reflicte unha desaceleración do 1,3%. Así mesmo, a destrución
de emprego intensificouse, chegando a taxa de paro ao 20,1% no segundo trimestre de 2010, con
máis de 4.600.000 persoas.
Pola súa banda, a taxa de variación interanual do PIB en España, aínda que continúa a ser negativa,
mostra unha paulatina recuperación ao situarse, no primeiro trimestre do ano 2010, no -1,3%, continuando
coa traxectoria de melloría que iniciara no cuarto trimestre de 2009 cun -3,1%; en contraste
cos trimestres anteriores: -3,3% no primeiro, -4,2% no segundo e -4,0% no terceiro de 2009.
Polo que respecta a Galicia, cabe dicir que a súa evolución foi bastante parella á do conxunto de
Estado, se ben cunha recesión menos intensa. Así, a desaceleración da súa actividade económica
agravouse no primeiro trimestre de 2009, cunha queda do PIB dun 2,1%, (nove décimas menos que
o descenso experimentado polo PIB español). No ano 2009 o PIB per cápita en Galicia situouse en
19.995 euros/hab., cunha variación interanual dun -3’1 %. No primeiro trimestre de 2010 o descenso
do PIB foi de -1,7%, polo que neste trimestre o descenso foi mais acusado en Galicia que no conxunto
do Estado (catro décimas). Aínda así, as perspectivas até final de ano son bastante favorábeis, por
mor dos efectos positivos que se agarda que represente para Galicia a celebración do Ano Xacobeo
Nesta conxuntura o PIB Galego ascende a 56.419.087 miles de euros, un 5,2% do total español. En
canto a renda per capita, con datos a 2008, a galega foi do 85,8% da media nacional cun valor de
20.619 euros (Datos Caixa Galicia).
xestión de residuos urbanos nos concellos do Eixo atlántico
19