Xestion de residuos urbanos.pdf - Axencia de Ecoloxía Urbana do ...

184
refugallos urbanos incluíndo datos da súa composición e perigosidade e das cantidades recollidas
nos diferentes fluxos, da calidade (no senso xa explicado da porcentaxe do material solicitado nun
fluxo determinado) destes o que permitirá a toma de decisións adecuadas na planificación tanto das
infraestruturas necesarias como da súa evolución así como definir as accións necesarias para motivar
ó cidadán co fin de acadar os obxectivos previstos.
Para este fin é necesario definir unha metodoloxía de toma de datos aceptada por todos os competentes
nesta materia e facilitar os instrumentos para o seu tratamento así como a definición de
indicadores que permitan observar a evolución da xeración e xestión dos residuos. Aquí é necesaria a
colaboración das partes e facilitar axuda aos pequenos municipios que carecen dos medios adecuados.
A integración destes municipios en consorcios ou mancomunidades pode facilitar esta actuación.
A intervención da Xunta de Galicia, en colaboración con a Federación de Municipios e Provincias
de Galicia así como con entidades de natureza similar ao Eixo Atlántico, debe ser o catalizador que
permita dispor desta rede de información que é absolutamente necesaria para a xestión sostible dos
residuos. Por último dicir que esta toma de datos, utilizando as modernas tecnoloxías, poden permitir
o seu uso na xestión diaria optimizando rutas de recollida e mellorando os custos económicos e
ambientais e non soamente seren utilizados para a planificación xeral.
O seguinte aspecto en importancia é a necesidade de racionalizar a xestión dos residuos nun dobre
aspecto: Agrupar o máximo posible as entidades locais de maneira que sexan aproveitadas ao máximo
as infraestruturas de recollida e tratamento e en segundo lugar que as decisións sobre os fluxos
a recoller e tratar separadamente estean baseadas no carácter ambiental das recollidas selectivas.
Xa explicamos a distribución da poboación en Galicia e a súa asimétrica evolución así como a importante
dispersión que xunto as precarias condicións económicas de moitos municipios fan absolutamente
necesaria a racionalización mencionada. E isto pasa pola utilización de ferramentas como o
análise do ciclo de vida así como de instrumentos legais que favorezan, como xa repetimos dabondo
anteriormente, a maior cooperación posible dos municipios e, por último, adoptar os sistemas e tecnoloxías
adecuados á distribución e dispersión da poboación, a súa rede viaria e a idade da poboación.
Debe ser esta lóxica a que determine as fraccións a recoller, a modalidade de recollida e o tipo de
infraestrutura a utilizaren e dicir: ¿qué recoller? ¿onde? ¿con qué frecuencia? ¿cómo?.
Aquí poderíamos engadir , dentro da lóxica da racionalidade ambiental e económica que, para o tratamento
dos residuos incluíndo as operacións de reciclaxe, a aplicación do principio de proximidade
tense que facer de acordo co exposto no artigo 16.4 da directiva de residuos e polo tanto non hai que
pensar que as instalacións de tratamento teñen que cubrir en cada estado membro o rango completo
dos residuos e polo tanto con maior razón no caso das comunidades autónomas.
Seguiremos así as directrices da directiva marco fronte as decisión de carácter puramente económico
ou de oportunidade política (por estar de moda por exemplo).
No terceiro lugar temos que mellorar a calidade das recollidas selectivas que ven influída pola infraestrutura,
tipo e cantidade, e pola actitude e coñecemento da poboación con respecto a ela. Aquí é
necesario desenvolver campañas de información e sensibilización xunto co a adopción das medidas
fiscais (taxas) que incentiven a separación responsable no fogar. Esta é unha acción ineludible - xa
amosamos que a maioría das taxas non teñen relación coa xeración de residuos nin co comportamento
adecuado no fogar- anque de complicada execución tanto dende o punto de vista técnico
como político. Por último é importante o grao de convicción das autoridades , respecto ás medidas
que adoptan nesta materia, ante os ollos dos cidadáns.
Estudos desenvolvemento sostible