Xestion de residuos urbanos.pdf - Axencia de Ecoloxía Urbana do ...

desenvolvemento sostible vol.1
Con respecto as primeiras temos que traer aquí os resultados dun estudo feito por Ecoembes no ano
2010, relativo ó incremento de custo debido a implantación desta modalidade: ó menos 900 millóns
de euros sobre un custo actual de xestión dos residuos urbanos de preto de 2.200 millóns de euros
(sen ter en conta o custo dos funcionarios e instalacións utilizadas). Aínda que estes cálculos os hai
que tomar coas debidas precaucións, a magnitude do incremento de custo é tan importante (cerca
dun 50 % dos custos netos actuais) que habería que facer un estudo sobre a repercusión real do contido
do borrador e dos aforros ambientais que se poidan conseguir coa utilización deste modelo. E
tamén hai que pensar como podería afectar ás recollidas que, actualmente se están a facer noutros
fluxos, como RAEE, envases, pilas
Tamén xorden dúbidas na interpretación do seguinte texto do borrador: “os sistemas de recollida
separada existentes poderanse adaptar á recollida separada dos materiais aos que se refire o parágrafo
anterior”, ¿quere isto dicir que o contedor amarelo que recolle os envases lixeiros (mesturando
plásticos, cartón para bebidas e metais) pódese utilizar para a recollida separada, aínda que mesturada,
de metais, plásticos e tamén do cartón para bebidas? E se é así ¿podería darse o caso de que
sí se acadaren os obxectivos do artigo 26º soamente coa recollida separada dos envases, poidamos
manter as cousas como están, sacando do tema dos biorresiduos?
A respostas a estas preguntas van ter unha grande incidencia nos procesos de recollida e tratamento
de residuos e nos custos da xestión, e que desde a perspectiva dos entes locais, soamente unha importante
ampliación dos produtores de produto sometidos ó principio de responsabilidade ampliada
do produtor podería resolver a situación financeira sen incrementar as taxas municipais. Pero non hai
que esquecer que sempre serán finalmente os cidadáns nos que no seu rol ben de cidadáns (pago de
taxas e impostos) ou ben como consumidores (punto verde o similar), os qué se fan cargo dos custos
da xestión.
Pero o fin da recollida separada, segundo o anteproxecto, non é outro que conseguirmos cumprir cos
obxectivos de preparación para a reutilización e do reciclado (sendo responsábel as comunidades
autónomas de tomaren as medidas necesarias para garantir a súa consecución).
Na versión de decembro se permite a mestura no contedor amarelo de plásticos, metais e brics sempre
que non supoña un incremento de dificultade na reciclaxe ou un incremento dos custos. Polo
tanto quedarían resoltas parte das preguntas anteriores.
Estes obxectivos para os residuos domésticos son os de acadar, antes do ano 2020, o aumento, até
un 50% en peso total, para a preparación para a reutilización e o reciclado dos residuos de materiais
tales como, polo menos, papel, metais, biorresiduos , plástico e vidro. Pero o borrador engade a
continuación “e probablemente doutras orixes na medida en que estes fluxos de residuos sexan
similares aos domésticos”.
Aquí, tal como está redactado o parágrafo, preguntámonos ¿pódense sumar as cantidades destinadas
á reutilización e á reciclaxe procedentes dos residuos domésticos coas doutros de similar natureza
co fin de alcanzar dito 50 % ou deben ser conseguidos individualmente?
A resposta que lle de a esta pregunta pode modificar as actuacións a facer e os custos das mesmas
por parte e para a entidade local.
En canto ó obxectivo de acadar a reciclaxe dun 50 % dos biorresiduos de orixe doméstica hai que
salientar que é unha novidade con respecto a directiva marco de residuos xa que nesta última non se
fixan obxectivos para os biorresiduos e si para o resto dos materiais como xa vimos.
xestión de residuos urbanos nos concellos do Eixo atlántico
139