Xestion de residuos urbanos.pdf - Axencia de Ecoloxía Urbana do ...

134
O mesmo cómpre dicir dos decretos que regulan a xestión de fluxos especiais. Mesmo hai decretos,
como por exemplo o que trata da xestión dos aparellos eléctrico e electrónicos, que se puxeron en
marcha pero o seu cumprimento non está a ser satisfactorio.
A lei de envases e residuos de envases e o decreto que a desenvolve, tamén esgotaron a súa virtualidade,
aínda que neste caso cun resultado moito máis satisfactorio desde o punto de vista práctico,
se ben quedan cousas por mellorar.
Con respecto a lexislación galega hai que dicir que incorpora importantes novidades en relación á
vixente lei de residuos española, estando o seu contido próximo ao contido da directiva de marco de
residuos (están aprobadas ambas as dúas en datas veciñas).
Poderíamos facer, a continuación, a análise de como a lei galega enmarca o futuro da xestión dos
residuos en Galicia, pero no momento de escribir este libro estase a preparar, polo Ministerio de Medio
Ambiente, e Medio Rural e Mariño, unha nova lei de residuos da que o borrador xa foi publicado
(Versión do 10 de xuño de 2010), e que incorpora a transposición da directiva marco de residuos.
Xa que logo, por mor de economizar, ímo-la analizar xunto coa lei galega, desde a perspectiva das
entidades locais aínda que sen esquecermos a perspectiva autonómica cando os cambios sexan de
grande importancia con respecto a lexislación vixente.
6.2.1.1. Borrador do anteproxecto de lei de residuos e solos contaminados (Versión do 10 de xuño do
2010, modificación de setembro de 2010 e decembro 2010).
O gran número de cambios conceptuais, en relación á lei do ano 1998, que implican un novo enfoque
nas obrigas de xestión dos residuos, da propia xestión e das fontes de financiamento dos residuos
xerados nos territorios das entidades municipais, fan deste anteproxecto un importante instrumento
dos futuros cambios da devandita xestión, polo que é recomendable que os responsables, autonómicos
e municipais, fagan unha fonda análise das súas consecuencias.
Aquí repasaremos as novidades de maior calado e o lector interesado poderá encontrar no anexo
referente a esta lei unha análise feito polo miúdo.
Así, con relación o seu obxecto, na primeira versión (Xuño) ponse o acento na protección do medio e
da saúde así como na eficacia no uso dos recursos (aínda que pensamos que debería engadir o termo
eficiencia) fronte a énfase que a vixente lei pon nos instrumentos para previr a produción de residuos;
mais na versión de setembro desaparece “así como a eficacia..” , polo que desaparece a maior
diferenza fronte á lexislación vixente.
Esta relevancia tamén é posta de manifesto pola lei de residuos galega no seu artigo 2º Obxectivos,
aínda que o obxecto da lei galega é o mesmo que o da vixente lei española.
Entre as definicións que permanecen, cambiando o seu contido, temos a de produtor de residuos;
na vixente lei non son considerados produtores de residuos aos suxeitos que produciran residuos xerados
como resultado do consumo doméstico mentres que agora non fai dita excepción, polo que o
produtor dos residuos xerados no seu fogar poderá considerarse “legalmente” produtor de residuos.
Outra das definicións que cambia é a definición de reciclaxe onde desaparece como tal “ a compostaxe
e biometanización” e aparece “ a transformación do material orgánico”; este cambio xunto coa
nova definición de biorresiduo e a modificación da de compost poden chegar a teren importantes
efectos na consecución de obxectivos de reciclaxe así como consecuencias na viabilidade das actuais
infraestruturas de biometanización e compostaxe derivadas; tamén poden afectar significativamente
Estudos desenvolvemento sostible