Capa Escrita Pura e Dora - Asociación de Escritores en Lingua ...

O que doe
Non dóe a luz. Non doe si os ollos inda a ven.
Non doe a seda. Esa mapoula avermellada.
Nin a auga das bágoas nin o brancor da pel
nin o celeste lume que os solpores apagan.
Non doe o amor. Nin ese gozo núbil dos lábios.
As tenras anainías. Os saciados amantes.
Non doe o escorzo suave dunha man polas sens
nin o segredo ardente das palabras. Un nome
non doe si o aroma tingue o sorriso da tarde.
O delirio dos bicos mata a dolor que abrolla
na quente pluma, o sangue dos áxiles paxaros.
No vizo dunha folla ou nos cercos das búas.
No tempo dos rolantes solsticios ancorados.
Só doe a fame. Fire o fulgor das espadas.
O desamor. O berro. Cantigas que non soan.
A tremente tristeza dunha pomba sen azas.
Doe a pisada herba. Os sabucos do mundo.
As feridas cravadas nunha carne que enfría.
Os metais adondados polo brillo das lágrimas.
Un meniño que fuxe cun pan baixo da axila.
45
De Orballa en tempo lento