Capa Escrita Pura e Dora - Asociación de Escritores en Lingua ...

Idade Idoira onte
Foi unha idade idoira. Presentía
abrochar desvaríos. Lumes fondas.
Baixo a sombra da espiga. Dos trigais
collía peitaliños de mapoulas.
Alardeaba en leiras do acendido
amaranto. Das prímulas luxosas.
Da camelia brillando sen recendos.
Da doncelez fulgúrea das magnolias.
Cando medrei fun repasando mundos.
Pisei veludos prados lamacentos
e lascivas, suavísimas alfombras.
Lameiros florescentes. As espadas
frescas das erbas. As maduras froitas.
Andei polas follaxes derrotadas.
Os limpos seixos beirarríos. Dondas
florciñas de colores. Celmes astros
alumáronme os vougos da memoria.
Nun corruncho de min houbo unha nena.
Paxaro ceibe remontando as horas.
Enredei cos cristais. Coas xebras verdes.
Coa fluente brisa. As mariñeiras ondas.
Bebín a luz no colo dos abrentes.
Durmín baixo a orballada das auroras.
37
De Orballa en tempo lento