Capa Escrita Pura e Dora - Asociación de Escritores en Lingua ...

Unha data histórica
Xa nos atopamos na data que no xuño nos tiña sinalada a Asociación de Escritores
en Lingua Galega, para adicarnos a Dora e a min unha homenaxe pola nosa
traxectoria, máis de sesenta anos na vida da cultura xornalística e literaria. Unha
homenaxe da que xa tiñamos algunha referencia de tempo atrás, encontrada no
xornal de Santiago “Galicia Hoxe” e no “El correo Gallego” da mesma localidade.
Este último, ca sinal de “Maré”, tiña nunha ringleira unha noticia que se
refería a nolas dúas, e dicía algo que nos fixo sobresaltar o corazón e as bágoas
dos ollos.
Dicía así: “Homenaxe: Pura e Dora Vázquez recibirán en xuño na cidade das
Burgas o tributo anual da AELG en recoñecemento a máis de seis décadas de
literatura...” E noutra páxina, no título de “Sempre unidas”, falábase da nosa
laboura literaria: ensaio, novela, teatro infantil e máis serio, contos, artigos e poemarios.
Engadían que seriamos protagonistas da homenaxe que, dende hai dez
anos, a Asociación de Escritores en Lingua Galega dedica a autores de escrita en
longos tempos. Tocaríanos este ano 2005.
Naquelas datas, do marzal deste 2005, saía tamén nun “Pan por Pan” do cotidiano
periodista e amigo Marcos Valcárcel, un fragmento que nos dedicaba para
darnos a noraboa, e viña cunha foto na que estamos nolas dúas “en la sala de su
casa”, como dicía no pé da foto, e un titular: “Pura y Dora Vázquez se escribe
con “E”, máis unha relación en redor dunha vindeira homenaxe que se nos pensaba
ofrecer para o mes de xuño, xuntamente cunha nota de que a AELG “ha
decidido que sea esa pareja la protagonista de su tradicional homenaje “Escritor
na súa terra”, e que tería lugar no próximo 25 de Xuño, en Ourense, onde moramos
xa dende en tempos.
A todo iso xuntábanse outras referencias, que moito agradecemos, sobre a
nosa obra cultural e literaria, a nosa convivencia xuntas e unidas, traballando na
literatura e na xornalística ó longo de seis décadas. Engadíanse notas culturales,
biográficas e recoñecimentos á nosa laboura, sobre todo a Pura, que recibira
varios premios da Xunta de Galicia en diferentes etapas, e outras entidades
ourensáns. Este escrito biográfico cultural sinalábao Sonia Torre.
31