Capa Escrita Pura e Dora - Asociación de Escritores en Lingua ...

O sábado 19 de febreiro de 2005 reúnese ás 17.00 horas no Museo do Pobo
Galego a Asemblea Ordinaria Anual de Socios e Socias da AELG para acordar,
entre outros puntos da orde do día, a escritora ou escritor que será homenaxeado
este ano na súa terra natal no marco dunha iniciativa fixa e anual que, ao longo
dunha década, se ten instituído para a familia da AELG e para o conxunto da
sociedade galega, como un contrapunto á celebración do Día das Letras Galegas.
Neste caso, a AELG quere honrar os nosos escritores e as nosas escritoras
en galego vivos, procurando, portanto, implicar a figura homenaxeada na propia
xornada de celebración nun contacto directo.
Para esta edición de marcada simboloxía popular, o Presidente da AELG,
D. Cesáreo Sánchez Iglesias, presenta perante os asistentes á asemblea
como única candidatura o nome de dúas escritoras cuxa extensa e polifacética
obra literaria se ten convertido en referencia obrigada para a comunidade
galega, mais non unicamente, pois a súa palabra permanece tamén viva
en xornais e revistas de fóra de Galiza. Esta asemblea de socios e socias da
AELG quere pór en valor a súa atención e dedicación á totalidade dos xéneros
convencionalmente establecidos, dando ao prelo un continuum de voces
e universos temáticos propios ao longo de toda a segunda metade do século
XX, a diversidade do público destinatario da súa dilatada obra, tanto do
punto de vista cualitativo como cuantitativo, procurando sempre un espazo
de atendemento para o público lector máis novo, así como o seu fraternal
compromiso, en fin, para cun idioma que priorizaron e asumiron como propio
na súa práctica escrita, mesmo nas épocas máis comprometidas e á vez
comprometedoras.
A Asemblea de Socios e Socias da AELG aprobou nesta xornada, por unanimidade,
concederlle esta XI Edición Homenaxe “As escritoras na súa
terra” ás escritoras ourensás Pura Vázquez e Dora Vázquez. Así mesmo, esta
asemblea acordou nomealas Socias de Honra da AELG en convivio de
irmandade con aqueloutras figuras senlleiras e insignes da historiografía
literaria galega que as precederon: Avilés de Taramancos, Bernardino Graña,
Manuel María, Mª Xosé Queizán, Xosé Neira Vilas, Uxío Novoneyra, Luz
Pozo Garza, Xosé Chao Rego, Xosé Fernández Ferreiro e Salvador García-
Bodaño.
17