baixar as receitas en formato PDF

Secuencia A
Ás oito da mañán comezo a facer tortillas.
Fágoas todo o día,
con e sen cebola,
soas ou acompañadas de leituga e tomate,
ás veces con chourizo,
moito en bocadillo,
sobre todo ás dez ou ás once,
tortillas dos andamios para os obreiros
que berran e traen as mans sucias.
Cómenas con cervexa,
os días grises, sentados trala barra.
Fran Alonso, Tortilla para os obreiros
O DEMO OVEIRO
Hai un demo que se chama Alistán, i asegún o Vento de
Cesures, ven en cáseque tódolos libros. Unha vez estivo doente, i
o médico que teñen os demos, que é de Toledo, recetóulle ovos de
galiña, bebidos. Iste Alistán fíxose oveiro e tamén o son tódolos
sus fillos e netos. Métense nun galiñeiro e beben tódolos ovos
que poñen as galiñas.
O sancristán de Seixido, que morréu fai poucos anos e
discutía sempre que parira un búgar, e que era iste caso
estudado, era mui perito en botalos demos oveiros dos galiñeiros.
O pior distes demos non é soio os ovos que beben, senón si que
estando sempre mirando prás galiñas, en agarda de que poñan,
istas entolean sob o ollo do demo, chocan sin tempo, deixan de
pór i enfraquecen, e morren..... Pra botar dos galiñeiros ós demos
oveiros abonda con espiñolo albar. Tamén, de paso, pódese poñer
un cagallo de endego.
Álvaro Cunqueiro
64