Eventyrreisen - YOGA i skolen

Tove Kvanmo har med Eventyrreisen, Yoga i skolen skrive ei spennande bok tilpassa barn i alderen
5-10 år. Målgruppene for boka er lærarar som underviser barn i 1. til 4. klasse, barna sjølv, foreldre
og andre vaksne som vil tilby yoga til barn. Eit underliggande spørsmål i boka er kvifor skal barn på
småskuletrinnet få læra seg yoga? Forfattaren peiker på korleis barn i dag har mykje stress i kvardagen
sin; aukande krav til prestasjon i skulen, konstant stimulering og kommersielt press via ulike media, stor
aktivitet i fritida, og stundom fleire heimar å forhalda seg til. Alt dette medan barna utviklar seg og skal
finna ut kven dei er.
Eventyrreisen-boka viser korleis yoga tilbyr verktøy som inneber fokus på pust, rørsle-posisjonar (asanas)
og meditasjon. Gjennom fokus på pusteteknikkar – alt frå ballong- til hare- og bjørnepust - kan barn
bli betre kjende med seg sjølv og med kva dei føler i kroppen og tenker på. Boka vektlegg at yoga og
meditasjon er verktøy som kan gi meir ro og velvære i både barnas kropp og sinn. Kvanmo understrekar
at yoga kan bidra til betre livsmeistring, noko som er blitt eit sentralt mål i norsk skule. Forsking på
innføring av yoga i skulen viser også at yoga kan bidra til betre mental helse, konsentrasjon, læringsevne
og trivsel.
Ved at yoga introduseres i småskulen – slik Eventyrreisen-boka legg opp til - vil ein kunna nå mange
barn tidleg, noko som er viktig frå eit folkehelseperspektiv. Kvanmo framstiller yoga-øvingar på ein artig
og leikande måte, med vekt på tilknyting til natur og dyr. Boka inneheld veiledning for både vaksne og
barn og gir også forslag om korleis konkrete yoga-øvingar kan tas i bruk i ulike fag i småskulen. Dermed
kan boka bli ein fruktbar ressurs for lærarar og elevar – noko dei kan samarbeida om i skulekvardagen.
Kvanmos bakgrunn som lærar og hennar store engasjement for barn og yoga kjem godt til uttrykk i boka,
som sterkt anbefales!
Ingunn Hagen, Professor, Institutt for psykologi, NTNU