SIDDIS BRASS

Helsing frå Norges Musikkorps Forbund
Musikalsk fest!!
Norges Musikkorps Forbund helsar Siddis Brass og ønskjer lukke til med
årets arrangement!
Siddis Brass er innbegrepet av underhaldningskonkurranse i korps-Noreg.
«Underhaldning», kva er det? Svaret; dette er opp til kvart korps å finna ut
av. Ein føresetnad er at korps og dirigent sjølv har tru på at nettopp dette
konseptet og musikkprogrammet er noko som vil fengja publikum. For å
kunna underhalda andre må ein sjølv ha det moro! Då er det gode sjansar
for at bodskapen også når fram til publikum og domarar.
Å berre satsa på noko ein trur domarane forventar å høyra, er neppe ein god strategi.
På Siddis er heldigvis takhøgda stor, difor er også spekteret i repertoarvalet breitt.
Kva så med del to av omgrepet «underhaldningskonkurranse» – konkurranse? Korleis kan ein
konkurrera i noko så ullent som «underhaldningsmusikk»? Som sagt; dette kan vera så mangt.
Når Siddis Brass har vore ein viktig musikalsk møteplass gjennom so mange år, må det vera
fordi arrangøren treffer noko hjå deltakarane: ein konkurranse i uformell og vennleg atmosfære,
samstundes som korpsa tek den musikalske kvaliteten på fullt alvor. Nettopp fordi det ikkje finst
nokon definisjon på kva som er rett og gale, gjer dette Siddis Brass til ein svært interessant arena
der korpsa vender tilbake - år etter år. Dette gjer også terskelen for å presentera nytt repertoar
mykje lågare. Faktisk kan det vera musikk som enno er «uhøyrt» som finn vegen til dei beste
plasseringane og framtidas kjernerepertoar hjå korpsa.
Sist, men ikkje minst: Siddis Brass er eit viktig «slektstemne» for brassentusiastar. Konkurrentar,
ja vel – men først og framst vener og familiemedlemmar av den store brassfamilien - som tek
vare på kvarandre og støttar opp under den overordna saka: å utvikla brassrepertoaret og brassband
som fenomen.
Miljøet kring Siddis Brass og dei gode fasilitetane i Stavanger er dei gode grunnane til at NMF
har vedteke å melda interesse for å arrangera Europameisterskapen for brassband i Stavanger i
2023. Vi gler oss til å arbeida vidare med et slikt prosjekt.
NMF gratulerer med nytt strålande Siddis Brass, og vi seier på ny til musikantar, dirigentar,
domarar, arrangør, frivillige heltar og publikum; Ha ei strålande helg, og Lukke til!!
Beste helsing
Norges Musikkorps Forbund
Karl Ole Midtbø
Generalsekretær
Harald Eikaas
Musikksjef
15