Nynorskrettskrivinga - Språkrådet

131
Nordfjord (nokor/noka), Romsdal (nåkker), på Nordmøre og i Sør-Trøndelag finst når.
Når det gjeld onnor (ånno, annor, ænnor o.l.), finst denne forma ved sida av an i nokre
bygder i Nord-Gudbrandsdalen, til dels i Numedal (vanleg er a’en), Vest-Telemark,
Indre Agder (m.a. Setesdal), mange stader på Jæren, Sunnhordland (ødnor o.l.),
Hardanger, Voss, Sogn, Nordfjord (annå el. anna), Sunnmøre, Romsdal, nokre bygder
på Nordmøre og i Sør-Trøndelag (ved sida av andre former).
Skriftmålsgrunnlag
I det publiserte tekstmaterialet Åse Wetås har undersøkt, er hovudformene heilt
dominerande. “Klammeforma [onnor] ser ut til å vera den mest marginale her, […]
Klammeforma [nokor] er også tilnærma fråverande.” Søk i nynorske aviser i Norsk
Tekstarkiv gav éin førekomst av nokor, mot 58 av noka. Elektroniske søk i lokalaviser,
Bondebladet og Bergens Tidende gav ingen treff på nokor, medan klammeforma onnor
var brukt i fire tilfelle. Når det gjeld det upubliserte tekstmaterialet, meiner Wetås å sjå
nokre hovudtendensar i delmateriala av barne- og ungdomstekst. Det var m.a. ein klår
tendens til bruk av hovudformene nokon og annan. Klammeformene nokor og onnor
var ikkje nytta i det heile. I minneoppgåvematerialet som er nemnt i punktet ovanfor,
fann ho eitt belegg på onnor frå Oppland og eitt på onnorleis frå Telemark. Skrivarane
frå Nord-Trøndelag brukte berre hovudforma anna.
Etter Lars S. Vikørs undersøking er hokjønnsforma onnor brukt av fire forfattarar
frå 1930-åra, berre éin bruker forma nokor. I 1950-årsforfattarskapane finst onnor hjå
ein, medan ein vekslar mellom anna og onnor. Ingen av dei skriv nokor, og både onnor
og nokor er heilt fråverande hjå forfattarar i 1970-åra.
Vurdering
Forma [nokor] står nokså svakt i dialektane. I skriftspråket har ho etter kvart vorte
trengd ut av noka. Det skulle ikkje vera nokon grunn til å halda på denne forma i
rettskrivinga lenger. Det same kan seiast om [onnor], som mest aldri er å sjå i skrift
lenger. Her har anna teke heilt over som hokjønnsform.
Konklusjon
Me rår til at hokjønnsformene [onnor] og [nokor] går ut or rettskrivinga.
3.2.3.e Det peikande pronomenet sjølv i fleirtal
Status i dag
I dag kan ein bruka både sjølv og sjølve som fleirtalsform.