NB-BibliothecaNova 0414nett

KVIFOR SAMISK BIBLIOGRAFI ER VIKTIG
Alle dei samiske språka er små, også samanlikna med norsk. Det er derfor
viktig at dokument på samisk blir systematisk registrerte, og at denne
informasjonen blir gjort allment tilgjengeleg. Dette er ei primær oppgåve
for Samisk bibliografi.
Like eins er det viktig at vi uavhengig av språk dokumenterer samisk kulturell
og litterær verksemd, samisk næringsliv, organisasjonsliv og politikk.
Det er mange tema som er perifere for storsamfunnet, men sentrale i ein
samisk samanheng. Viktige samiske merkeår er 1751 (lappekodisillen, dvs.
grensa mot Sverige vart fastsett), 1917 (det første samelandsmøtet) og 1989
(Sametinget vart opna). Dette må bibliografien ha eit vake auge for.
Noreg har ratifisert ILO-konvensjon nr. 169 om urfolk og stammefolk i sjølvstendige
statar. Konvensjonen peikar m.a. på det kulturelle mangfaldet urfolk
representerer, og Samisk bibliografi er med og dokumenterer dette mangfaldet.
KVA ER SPESIELT MED SAMISK BIBLIOGRAFI
Når vi arbeider med Samisk bibliografi, er det naturleg å sjå verda gjennom
samiske briller. Med det meiner eg at bibliografien må spegle av det som er
viktig for samar. I tillegg til solid samisk språkkunnskap, må ein òg ha så god
kunnskap om samiske emne at klassenummer og emneord blir korrekte.
Utval
Utval til bibliografien er ei heilt grunnleggjande oppgåve. Vi går kvar veke
gjennom alle nye pliktavleverte monografiar og hefte i monografiseriar.
Dokument til bibliografien blir plukka ut. Her må vi ta stilling til om vi skal
ta inn heile boka, eller berre enkeltartiklar eller kapittel. Vi vurderer også
om det samiske aspektet er tydeleg nok.
Når det gjeld periodika, har vi ei liste på rundt 300 titlar der vi kvar veke
går gjennom nye hefte. Lista inneheld for det første titlar på samisk, men
det meste er periodika og årbøker som i varierande grad inneheld samiskrelevante
artiklar.
Vi har ikkje noka absolutt nedre grense for omfang av ein artikkel, men vi tar
ikkje notisaktig stoff. Derimot er vi opne for relativt korte artiklar når det
gjeld personhistorie og lokalhistorie. Geografisk er lokalhistorie interessant
frå Femundsområdet og nordover.
124