Innstilling til ny rettskriving for det nynorske skriftmålet - Språkrådet

d) Per Vestbøstad: Nynorsk frekvensordbok. Dei vanlegaste orda i skriftleg nynorsk henta
frå aviser, sakprosa og romanar 1978–1984 (Bergen: Alma Mater 1989) er brukt for
ein del av frekvensopplysningane.
1.7.2 Det nynorske tekstkorpuset
Under vurderingspunktet «Status i dag», som går att i drøftingane, tek me utgangspunkt
i ordtilfanget i Nynorskordboka.
Når det gjeld «Skriftspråkleg tradisjon og praksis», har me i stor grad brukt det nynorske
tekstkorpuset ved Universitetet i Oslo. Nemnda har brukt ressursar på å utvida
korpuset, som har auka frå ca. 40 millionar til nesten 86 millionar ord. Det inneheld
skjønnlitteratur, avistekstar, tidsskriftartiklar, læreboktekstar, religiøse tekstar og
tekstar frå offentleg målbruk frå 1880-åra og fram til i dag, med hovudvekt på dei siste
femti åra.
Kva for former som er mest utbreidde i skriftleg bruk, har til dels samanheng med
tidlegare normeringspolitikk. Det har vore stilt spørsmål ved om det er rett å telja opp
kor mange treff ein får på ulike former, og bruka det som argument for å velja den eine
eller andre forma. Mellom anna har det vore nemnt at korpuset stort sett inneheld
normerte og/eller korrigerte tekstar, og at det gir hovudformene ein fortrinnsrett. Den
heilt dominerande delen av tekstane i det nynorske tekstkorpuset er likevel tekstar som
bruker den vidare rettskrivinga. Læreboknormalen gjeld berre for lærebøker og tekstar
frå statstenesta, og i mengd utgjer dei ein liten flik av det samla tekstmaterialet.
Nynorskkorpuset er såleis den beste kjelda me har til å undersøkja kva former som blir
brukte av folk som skriv mykje. Det store volumet med tilgjengeleg tekst gir oss god
dokumentasjon på den faktiske nynorske tekstproduksjonen når det gjeld publiserte
tekstar. Tekstane representerer eit breitt utval av det vanlege nynorskbrukarar les i det
daglege, og fortel derfor mykje om formval som påverkar nynorskbrukarar flest.
1.7.3. Andre kjelder
Nemndmedlemmene har hatt brei kontakt med brukargrupper i arbeidet, jf. punkt 1.1.3
ovanfor. Nemndleiaren og sekretæren har hatt 25 møte med representantar for miljø
som produserer mykje nynorsk tekst. Leiaren har vore på landsrådsmøtet i Noregs
Mållag, i mange lokale mållag og i møte med norsklærarar. I tillegg har dei fleste
nemndmedlemmene vore på møte i lokale mållag og/eller skular.
På desse møta har nemnda fått svært nyttige innspel. Det same gjeld innspela som har
kome via bloggen Nynorsk 2011, e-post og telefon.
Lars S. Vikør heldt foredrag om normering på opningsseminaret for
rettskrivingsnemnda 20. januar 2010, og foredraget hans, saman med artiklar han har
skrive om normeringsarbeid, har vore nyttige for arbeidet i nemnda.
35