Innstilling til ny rettskriving for det nynorske skriftmålet - Språkrådet

som synonyme ord. Til dømes kan dei ha kome inn i nynorsk rettskriving ulike vegar og
ha ulike bøyingsmønster, som verba drynja og drønna. Dei har same opphavlege tyding
og same etymologiske opphav, ved at det eine kjem frå norrønt og det andre truleg frå
dansk. Det påverkar også bruksområdet deira.
Framtidige ordlister og ordbøker toler mykje større ordtilfang og fleire ordartiklar enn
dagens ordlister, fordi dei i stadig større grad blir digitale. Nemnda tilrår derfor nokre
prinsipp for når variantar skal oppfattast som ulike ord, og det er grunn for ordbøkene
til å føra opp to forskjellige oppslagsord. Orda bør oppfattast som separate ord og ikkje
som formvariantar når
dei har ulik bøying (døme: skuva/skyva)
dei har (til dels) ulikt semantisk innhald (døme: lut/lott)
dei har opphav i ulike språk (døme: grysja/grøssa)
Her skal helst fleire av kriteria verka samstundes, men eit minimumskrav er at to av dei
er dekte.
1.7 Kjelder
1.7.1 Innstillinga Nynorskrettskrivinga
Innstillinga frå Sandøy-nemnda, Nynorskrettskrivinga, har danna utgangspunktet for
arbeidet til denne nemnda, jf. punkt 4 i mandatet. Svært mykje av materialet me har teke
opp til vurdering, vart òg behandla av Sandøy-nemnda, og mykje av dokumentasjonen
og argumentasjonen i Nynorskrettskrivinga (heretter kalla 2002-innstillinga) er brukt i
denne innstillinga.
Frå 2002-innstillinga har nemnda henta opplysningar om diverse undersøkingar, jf.
litteraturlista for fullstendige opplysningar. Nokre undersøkingar er det referert til fleire
stader. Det gjeld mellom anna desse:
a) Talemålsundersøkinga som Norsk språkråd gjennomførte i 1999, her omtala som
TALE99. Dette er ei undersøking som kartlegg utbreiinga av ein del ord- og bøyingsformer
i dialektane.
b) Punktgranskingane. I 2001 gjorde Åse Wetås fire punktgranskingar for Norsk
språkråd. To av rapportane kartla språkleg variasjon i nynorske publikasjonar og i
ikkje-publisert nynorsk.
c) Lars S. Vikør: Rettskriving hos nynorskforfattarar. I serien Norsk språkråds skrifter
(1995). Det er ei undersøking av ortografi og morfembruk hjå 29 nynorskforfattarar,
tilnærma likt fordelte på 1930-, 1950- og 1970-åra.
34