Innstilling til ny rettskriving for det nynorske skriftmålet - Språkrådet

Vurdering
Språkbrukarane har tydelegvis ikkje den oppfatninga at langforma i infinitiv heng saman
med sterk bøying av verba. Av tabellen ovanfor med det vesle søket på gli og by ser me
at presensformene glid og byd prosentvis står sterkare i forhold til glir og byr enn det
infinitivane glida og byda gjer i forhold til gli og by. Det skulle tyda på at ein del
forfattarar skriv by – byd, og gli – glid.
Derimot må ein rekna med at dei fleste som bruker den sterke bøyingsforma glid i
presens, òg bruker den sterke partisippforma (har) glide. Spørsmålet blir dermed om me
skal halda på både svak og sterk bøying av desse verba i presens og perfektum partisipp.
Ut frå tabellen ovanfor og undersøkingar det er vist til i 2002-innstillinga, ser det ut til at
sterk bøying i presens står såpass sterkt at ho må vera med vidare, jamstilt med svak
bøying.
Når det gjeld by(da), gni, skli, stri(da) og vri, har dei svake preteritumsformene av desse
verba vore i nynorskrettskrivinga iallfall sidan 1959, og både den svake og den sterke
forma er i bruk i skrift.
Dei svake formene [drar – dradd/dratt], [lar – latt] og [tar – tatt] er svært mykje i bruk i
skrift, og dei bør framleis ha ein plass i rettskrivinga.
Både talemålet og skriftmålet gir eit godt grunnlag for valfridom mellom sterkt og svakt
presens og perfektum partisipp av dei nemnde verba på éi staving i infinitiv. For
systematikken sin del bør ein behandla alle desse verba mest mogleg som samla gruppe
med alternativ bøying i presens og preteritum. Det kan gi gode pedagogiske reglar.
Verba gni, skli, stri og vri bør framleis ha valfritt svakt og sterkt bøyingsmønster.
3.4.5.c Sluttkonsonant i preteritum av ein del sterke verb
Status i dag
Desse verba har i dag obligatorisk sluttkonsonant i preteritum:
be(da), dra(ga), gi/gje/gjeva, stå [standa]
Preteritumsformene er i dag: bad, drog, gav, stod [sto]
Dessutan er det nokre verb som i dag har valfri sluttkonsonant etter diftongen ei i
preteritum:
Preteritum:
gli(da), gni(da), li(da), ri(da), skli(da), skri(da), stri(da), svi(da), vri(da)
166