UGULSVIK KRAFTVERK

3.0 Verknadar for miljø, naturressursar og samfunn Ugulsvik kraftverk
3.6 Flora og fauna
Kartlegging av flora og fauna er eit viktig grunnlag for vurdering av det biologiske
mangfaldet i området. Rapporten om biologisk mangfald har sett på karplantefloraen,
lav- og mosefloraen, sopp, virvellause dyr, fugl og pattedyr. Sjå nærmare omtale i kap.
3.4 og vedlegg 9.
3.7 Landskap
Miljørapport ”Kartlegging og verdivurdering av landskap naturmiljø og kulturmiljø i
Luster kommune”, som vart utarbeidd av Aurland Naturverkstad DA i 2006, vurderte
verdien av landskapet i delområde ”Veitastrond, nedre” til svært stort. Dette var ein
fagrapport som vart utarbeidd i samband med Luster kommune sin kommunedelplan for
små kraftverk. I rapporten er det peikt på uvanleg sterkt heilskapsprega område med
dominerande fjellformer og bratte dalsider. Kontrasten mellom bratte fjellsider, høge
toppar med brear og snøskavlar og det lange Veitastrondsvatnet gjev særs høg
inntrykksstyrke (Clemetsen M.& Skjerdal I.B. 2006 B). Landskapsklassifiseringa er sett
til A2. Klasse A som vil sei at landskapet inneheld det typiske landskapet i
underregionen og har kvalitetar eller komponentar som gjer landskapet eineståande med
eit stort opplevingspotensial. Klasse A2 har høg inntrykksstyrke og variasjon.
Vassdraget Vikaelvi (kalla Ugulsvik) er spesifikt omtala i same miljørapport frå Aurland
Naturverkstad. Det er trekt fram at elva har god visuell tilgjengelegheit, at ho er særs
synleg og framtredande og at elva er eit sterkt landskapselement. Elva er einaste
markerte fossestryket i landskapsrommet og gjev variasjon i vegetasjonsbilete og
terrengformasjonane. Rapporten til Aurland Naturverkstad konkluderar med at det samla
konfliktpotensialet basert på landskap, naturmiljø og kulturmiljø er stort. (Clemetsen
M.& Skjerdal I.B. 2006 A).
Elva er synleg frå fylkesveg 337 til Veitastrond etter å ha passert garden Uguslvik frå
sør. Frå nord er elva mindre synleg frå vegen. Det er ikkje fast busetnad i området. I
Vika er det eit par hytter og elva er og synleg frå høgdegarden Yngsdal (fråflytta). For å
kome til stølsområda over Ugledalen med blant anna Hongi, er det vanlegast å gå frå
stølsvegen ved Fossen. Det er berre fallrettshavar som har stølshus på stølen Ugledalen.
Øvre del av tiltaksområdet er planlagt veglaust. I byggeperioden og i nærmaste tida etter
vil røyrgata verte synleg, men dette vil vere relativt midlertidig og kan avbøtast med
såing/planting. Verknaden av inngrepet vil dermed reduserast gradvist. I nedre del av
tiltaksområdet er påverka av eksisterande fritidsbusetnad, kraftlinje og veger og her er
det planlagt etablert anleggsveg.
Øvre del av prosjektet vil påverke INON-område. Kring 1570 daa INON-område son 2
vil forsvinne, mens kring 33 daa INON-område sone 1 vert redusert til INON-område
sone 2. Øvre del av tiltaksområdet vert opplevd som minst påverka. Prosjektet er
planlagt veglaust i dette området og røyrgata vil over tid gro att.
Prosjektet er planlagt med slepping av minstevassføring gjennom heile året.
Konsekvensen for landskapet som følgje av dette prosjektet er vurdert som middels/stort
(--/---). Figur 4 viser oversiktsbilete frå prosjektområdet.
16