Det undrande språket: arbeidsoppgåver og bakgrunnsstoff

Oppgåve 4
Lag ei SMS-ordbok
SMS-språket er eitt av språka ungdomsskuleelevar brukar oftast. Dette språket endrar seg
heile tida, det er forskjellig frå stad til stad i landet, og det er gjerne ganske personleg. Mange
brukar innslag av dialekt (noko dei til dømes ikkje gjer i Sverige), slang, engelsk eller svensk
i tekstmeldingane sine, og kanskje finst det kodar og nyskapte ord som berre nokre få kan
forstå?
Våren 2003 laga Ørsta 9D ved Ørsta ungdomsskule si eiga SMS-ordbok i samarbeid med
Nynorsk kultursentrum. Dei samla inn alle SMS-orda på sin skule, lagra desse på ein database
og fjerna ord som høyrer til i det vanlege skriftspråket deira (i Ørsta er dette nynorsk). Etterpå
vart orda sorterte alfabetisk, og elevane fann ut kva ordklasse dei enkelte orda høyrer til.
Resultatet vart ei ordliste med over 400 ord og uttrykk. Nokre av orda hadde engelsk opphav,
medan andre var dialektord eller ord med lokale referansar. Eitt av måla med prosjektet var å
vise korleis ungdom snakkar med kvarandre no for tida, og ingen ord vart derfor sensurerte.
Ordboka vart trykt og seld til inntekt for utanlandstur i 10. klasse, og ho ligg også ute på
nettstaden www.aasentunet.no under Ivar Aasen-tunet/skule og barnehage/10d Ørsta
ungdomsskule. Den nøyaktige adressa er:
http://www.aasentunet.no/default.asp?menu=41&id=1719
Kan de lage ei liknande ordbok frå andre stader?
Vi i Nynorsk kultursentrum er svært interesserte i å sjå skilnader mellom SMS-språket i Ørsta
og andre stader. Oppgåva bør gjennomførast som eit klasseprosjekt, og lærarane dykkar har
fått ein kopi av innhaldet i Ørsta-SMS-ordboka. Dersom de vel å gjennomføre dette
prosjektet, kan vi kanskje få trykt ordboka. Ta gjerne kontakt med oss dersom de har spørsmål
rundt dette.