Det undrande språket: arbeidsoppgåver og bakgrunnsstoff

Oppgåve 2
Finn det beste ordet
I dialekten din finst det mange gode, artige, tøffe og rare ord. Du skal leite etter det ordet du
meiner det aller beste. Kanskje er det eit gamalt ord som nesten ingen hugsar lenger, eller kanskje
er det eitt av dei mest vanlege orda i dialekten din i dag? Det er fint om det er eit ord som ikkje er
så vanleg i andre dialektar i landet. Ordet kan gjerne seie heilt tydeleg at dei som brukar dette –
dei er heilt klart frå Stordalen, Hellesylt, Ålesund osv.
Slik kan du gjere det:
1) Du kan bruke SMS, og sende ut ei tekstmelding til alle du kjenner. I denne meldinga kan
du oppmode alle saman om å sende deg det ordet dei likar best. Sidan SMS-bruk mellom
anna inneber ein kostnad for deg som elev, må skulen og lærarane avgjere om elevane kan
få bruke mobiltelefon. Dette må du dermed avklare med læraren før du set i gang.
2) Du kan også sende ut ei oppmoding på e-post til dei du kjenner.
3) Du kan lage eit ark som du deler ut til folk du trur har gode ord på lager. På dette arket
må du forklare kva du ute etter, og be om at mottakarane fyller ut arket.
4) Du kan intervjue folk, og skrive ned dei orda dei kjem på. Hugs å få forklaring på orda.
5) Når du har fått inn ei stor nok mengd ord (du må sjølv avgjere kor mange du meiner er
nok), må du sortere dei, skrive ned kva dei betyr.
6) Etter sorteringa lagar du ei liste over det du vurderer som dei ti beste orda. Denne lista
sender du ut på nytt, gjerne til dei same folka som først fekk spørsmål om å sende inn
ord. Denne gongen ber du dei stemme over det ordet dei likar best.
7) Når avstemminga er ferdig, kan du sende inn den endelege lista til oss. Du må forklare
kvifor du trur det eine ordet vann, kva ordet betyr og kva ordklasse det er.
Lurt å hugse på:
• Det er lurt å ha ein svarfrist. Det er også lurt å be om ei forklaring på ordet.
• Du bør prøve å få inn ord frå ulike aldersgrupper.