Det undrande språket: arbeidsoppgåver og bakgrunnsstoff

Kven er vi?
Nynorsk kultursentrum er ei stifting som 21 fylke, kommunar,
utdanningsinstitusjonar, kulturinstitusjonar og organisasjonar står bak. Nynorsk
kultursentrum eig og driv Ivar Aasen-tunet i Ørsta, og gjennomfører eit breitt
kulturprogram året rundt. Høgdepunktet er Dei Nynorske Festspela i juni, ei årleg
feiring av den nynorske kulturen. Les meir på www.aasentunet.no
Det undrande språket er eit formidlingstilbod for ungdomsskulen. Her får de eit nært
møte med rapparen Runar Gudnason frå Side Brok - eller ein annan språkleg
kjendis. I samtale med elevane (og innimellom rappeinnslag frå Runar) diskuterer vi
rare og flotte dialektord, språkendringar, knoting, språk og makt og språkleg vane.
Kva betyr språket, både det munnlege og skriftlege språket når vi flyttar? Korleis
kan vi bruke språk og dialekt - til dømes i rapping eller anna populærkultur?
Tilbodet omfattar ei flott utstilling om ungdom og språk, der m.a. kong Harald og
ungdomsskuleelevar frå ulike delar av landet kjem til orde. Programmet blir bygd
opp rundt temautstillinga, og tanken er å skrive språkleg toleranse og identitet inn
på timeplanen. Vi vil de skal undre dykk over rikdomen i språket, og bli trygge på
og stolte av dykkar eige språk: Språket kan brukast til alt!
Oppgåver til etterarbeid
Vi har med oss noko bakgrunnsinformasjon og oppgåver til etterarbeid. Vi reknar
ikkje med at alle har tid til å gjennomføre oppgåvene, men håpar likevel stoffet kan
vere til nytte. Det de ikkje rekk no i haust kan kanskje takast igjen seinare. Dersom
de vel å gjennomføre oppgåvene, kan de sende dei til oss, slik at vi kan publisere
resultata på nettstaden www.aasentunet.no.
Kjersti Markegård Bae
Nynorsk kultursentrum
Indrehovdevegen 176
6160 Hovdebygda
kjersti.markegaard.bae@aasentunet.no
Telefon: 70 04 75 81