Rettsbok for Nord- og Midhordland jordskifterett - Domstolene

Partane gav utgreiing om saka.
Hans Arne Breivik synte til innlevert skriv og ynskte ei avklaring på om han kunne få
overta Gamlekaien vederlagsfritt sidan dei andre fekk kjøpa moloen ved Staven av
Kystverket til ein låg pris.
Trygve Breivik forklarte at kommunen lenge hadde tilbod om å kjøpe moloen ved Staven,
men avslo. Etter dette gjekk ein del av partane saman om å kjøpe moloen. Etter deira syn
var det klart at Hans Arne Breivik ikkje hadde noko krav om å få vera med i dette kjøpet
eller at han burde få overta Gamlekaien vederlagsfritt på grunn av dette.
Denne saka gjeld 5 område opprekna frå nord:
1. ”Frøskjæret”.
Dette er ein holme som ligg utanfor teig til bnr. 1. Holmen er innteikna på kartet for
utskiftinga i 1924, men var ikkje med i utskiftinga. På kartet er holmen merkt med a-f, noko
som tyder på sameige mellom bnr 1-6. Holmen har berre tilkomst over sjø. Etter partane sitt
syn bør denne holmen leggjast til bnr. 1 mot at dei andre partane beheld ein bruksrett til
landfeste for fastståande fiskereiskapar på yttersida av denne holmen.
2. Sams notbu på ”Gamlekaien”.
Her ønskjer partane grenseoppgang og oppløysing av sameiga. Området er skildra i
utskiftinga over innmarka avslutta i 1906. Deler av området er avhenda til kommunal kai og
veg. Partane skal drøfta og avklare kven av dei som skal overta dette området. Partane
ynskjer då at området skal skiljast frå som eige bruk og overskøytast som ein del av saka.
Det vart gjeve ein frist til å avklare dette.
3. Sams sjøhusområde i ”Staven”.
Dette fellesområdet vart skildra i innmarksutskiftninga slutta i 1906. Eigedomstilhøva i
dette området er endra gjennom forlik mellom eigar av bnr 1 og Arne Petter Solberg datert
27.10.2004. Når det gjeld deling av området mellom dei noverande eigarane, har partane
kome fram til ei semje om deling, jf dok nr 38. Denne delingsplanen skal avmerkast i
terrenget av jordskifteretten.
4. Sjøbu i sundet sør for ”Staven”, ved ”Garden”.
Dette er ei sjøbu som vart kartlagt under innmarksutskiftninga på Breivik slutta i 1906. Bua
er sett i stand av Kystmuséet og kan nyttast til lagring av utstyr. Den kan ikkje nyttast som
naust. Partane er no samde om at området kring denne sjøbua skal delast frå som eige bruk
og at dette skal overskøytast vederlagsfritt til Kystmuseet som ein del av saka. Dersom
Kystmuseet vil avhende dette bruket i framtida skal eigar av omkringliggjande eigedom (bnr
6) ha forkjøpsrett til denne eigedomen.
5. Sams areal på ”Norpeneset”.
Dette arealet er skildra ved utskiftinga, slutta 1924. Området ligg i teig til bnr. 6 og bør, etter
partane sitt syn, tilleggjast dette bruket.
Synfaring
Partane saman med retten drog deretter på synfaring. Ein såg først på området kring Staven.
Sidan vart sjøbua ved Garden synfart og til slutt såg ein på Gamlekaien. Avslutning av saka
vart drøfta. Meddommarane vart deretter permittert og partane saman med avd ing Kogstad
og jordskiftedommaren byrja utstikkinga av skrifteplanen ved Staven.
13