Jørgen Olafsen-Holm: Bolsøyboka 2 - Romsdal Sogelag

528
Halvor hadde to søner som vi kjenner til, Kittel og Ole. Ole
Halvorsen hadde eit gardsbruk på Roaldset, og budde der.
Kittel Halvorsen, født 1799, og gift med Kari Eriksdtr. Roaldset,
født 1791, tok over farsgarden etter Skjøte dags. 23-10-1829 for ein
kjøpesum stor 99 spd. og kår. Dei hadde eit barn, Randi, f. 25-1-1820.
Kittel var ein drivande kar, og ruver over alle i den ætta. Han bygde
nye hus på garden; stove, løe, stabbur, kvernhus, naust og stampe i
Gujordselva, der han stampa vadmål. Han bygde og fleire høyløer i
fjellet. Han dyrka i si tid 12-14 mål jord. Dei store steingardar og
steinrøyser på garden ligg der endå og vitnar om livsverket hans.
Det går mange sogor etter denne Kittel; eg skal nemna nokre
av dei, slik som eg har høyrt dei fortalt. Han var stuttvaksen og
uvanleg førbygd, men likevel ledug. Han skulle vera ein rein meister
på ski. Han kunne renna i full fart gjennom eit tunneband. Ein vinter
gjekk han på ski heilt til Hallingdal. Endå i brudlaupet til dottera
var han så sprek at han gjekk rundt og spende bjelkane med ei brennevinsflaske
i kvar hand. Dei laga i den tida all reidskapen sjølve.
Ein vår hadde han laga seg ein ny plog, men plogjarn måtte han
kjøpe. Han gjekk til Molde og skulle kjøpe seg plogjern, men det var
gjeld etter far hans hjå kjøpmannen. Han måtte betale den, og borga
fekk han ikkje. Han tok då på seg å rydja eit nybrot for kjøpmannen.
So gjekk han heim, skifta klede, la i nisteskreppa og gjekk utover att,
og i kveldinga var han på Molde andre gongen den dagen. Kjøpmannen
gav han ei flaske brennevin, og han tok fatt med arbeidet
same kvelden og arbeidde heile natta. Utpå morgonen kom ein fræning
til byen som han fekk leiga, og før kvelden kom var dei ferdige
med arbeidet. Kittel fekk plogjarn, ei potte brennevin og nokre skillingar
attåt, og kjøpmannen heldt det for eit kjempeverk. Etterpå gjekk
han heim til Gujorda om natta. Det må ein seia var ein lang og
strevsam arbeidsdag. Men det var harde levevilkår den tid, og få av
oss som lever no, skynar det.
Dotter til Kittel, Randi, vart gift med Ole Olsen Silset (Silset-Ola)
frå Øre, født 1816. Han kjøpte halvparten av Midtigard av Gullik
Olsen, etter skjøte dags. 2/4 1854, kjøpesum 189 spd., og kår. Den
andre halvparten av garden kjøpte han av verfaren Kittel Halvorsen,
etter skjøte dags. 19/6 1857, kjøpesum 50 spd., og kår. Randi og Ole
hadde 2 born, Ane og Knut. Ole Olsen dreiv garden godt, han hadde
stor buskap og gilde avlingar. Han køyrde heim til gjødselblanding
kring 400 lass myr kvart år.