JAARVERSLAG 2009 1. PERSONEEL 2. 2.1 2.2 2.3 ... - Lstellen.co.za

2.1 Graad R en Eekhorinkie
Ons het in die eerste kwartaal afgeskop met ons eie verwelkomingspiekniek waar ouers en kinders mekaar kon
leer ken. Ander hoogetepunte was 'n lekker besoek aan ‘n druiweplaas waar ons eers self druiwe geoes en toe
lekker getrap het! Die laaste week is afgesluit met allerhande pretaksies: Alyssa se mikrobioloogprofessormamma
het vir ons kom vertel van organismes: goeies en slegtes! Goeies wat die brood laat rys,
joghurt maak en ook druiwesap in wyn verander. Slegtes wat ons gesien het toe elkeen sy eie bakkie gekry het
en met vingertjies daarin gevee het, asook gehoes en genies en hare daarin gesit het en toe gelaat om 'n week
lank te kweek! Ons het ‘drumming’ gedoen, elk met sy eie trom, Hildegard se mamma het vir ons 'n fluitles en
demonstrasie kom gee en almal kon saam speel met verskillende instrumente. Helena se pappa, Pierre Nolte,
het ook vir ons kom sing. Ons het ook kans gekry om saam te sing en kan dus nou spog dat ons saam met
Valiant Swart gesing het!
In die tweede kwartaal het ons het besoeke onderneem na die JS Maraispark, na Elsenburg waar ons o.a. babavarkies
kon vashou asook na die brandweer. Die brandweer het vir ons ‘n vertoning gegee van hoe mens met
toue op en afklim. Dit het ongelukkige gereën en ons kon nie die dag in die skuim speel nie. Dit het wel die
derde kwartaal by die skool plaasgevind.
Gedurende die derde kwartaal het ons paddavissies gevang in die Jan Maraispark se dam om te kyk na hul
metamorfose na paddas. Ons was ook by die Tygerberg dieretuin en was ook so bevoorreg om ‘n heerlike, nat
lentedag in Tokara se pragtige tuin te kyk en kuier. Die reën het ongelukkig die kuiertjie kortgeknip.
Die vierde kwartaal het afgeskop met 'n beertjiepiekniek. Toe was dit tyd vir Revue, waraan ons nie deelgeneem
het nie, maar wel kon gaan kyk een oggend tydens die kleedrepetisie Daar was ook ‘n graad 1-dag waar die Gr
R-leerders in die klas gaan kuier het waar hulle volgende jaar sal wees. Ons het van ander lande geleer en die
week afgesluit met ‘n Chinese ete waar almal oosters moes aantrek en die roerbraai wat ons in bak-en-brou
gemaak het met regte oosterse stokkies moes eet! Ons gaan pluk self aarbeie by die aarbeiplaas, en sluit die
kwartaal op 'n hoë noot af met 'n week van pret en ‘n lekker piekniek. Hierdie jaar hou ons saam afskeid met 'n
lekker piekniek en 'n klein konsertjie.
Deur die jaar het ons gereeld gebak en gebrou, van sop en roerbraai tot broodjies en koekies! Ons hou ook 'n
entrepeneursdag in die vierde kwartaal waar ons lekkernye verkoop wat die leerders self in die bak- en brouklas
gemaak het. Ons het soveel wins gemaak dat ons 9 reuse pilates-balle kon koop waarmee die leerders baie pret
mee het.
Om enigiets werklik te kan belewe en nie net daarvan te hoor of in boeke te lees nie is baie waardevol Daarom
is ons uitstappies baie belangrik en ons bedank graag ons ouers wat help met die vervoer van ons kleuters.
Ons leerders het ook deur die jaar die voorreg gehad om te deel in die sport van die skool. Daar is met groot
entoesiasme aan tennis- en krieketafrigting in die somer, en netbal- en rugby-afrigting in die winter
deelgeneem.
2.2 Grondslagfase
Leerdergesentreerde onderwys tesame met basiese vaardighede en waardes vorm die hoeksteen van ‘n stewige
fondament in die Grondslagfase. Opvoeders beskik oor ‘n positiewe gesindheid, is kundig, uiters bekwaam en
funksioneer baie effektief as ‘n span. Opvoeders maak van elke moontlike geleentheid gebruik om hulself te
ontwikkel en te verryk en het ‘n verskeidenheid kursusse en werkswinkels deur die afgelope jaar bygewoon.
Ons glo daarin om ‘n basis vir standaardstelling daar te stel en daarom word werk en nuwe idees ook gereeld
met verskillende skole in Stellenbosch uitgeruil.