prospektus - Affies

PROSPEKTUS 2014
UK 2013

Inhoud
“Affies is ‘n Christenskool wat staan vir respek,
dissipline en uitsonderlike gees! Ons dink aan
gevolge en daarom tree ons met wysheid op.”
Boodskap van die skoolhoof 2
Skooldrag 2
Algemene oorsig 3
Akademie 4 & 5
Kultuur 6
Sport 7 & 8
Algemeen 9 & 10
Vakkeuse 11
Kontaknommers:
Mnr D H Kleynhans 016 976 1060
E-pos: affies@lantic.net
Webadres: www.affies-sasolburg.co.za
Kontak: charlotteb@lantic.net

Boodskap van die
van die skoolhoof
Beste Graad Sewe Maat
Dis sowaar al tyd om te besluit na watter hoërskool toe jy volgende jaar gaan!
Indien Affies jou keuse is, wag ‘n heerlike avontuur op jou:
- Affies se vakkeuse bied jou alles wat jy mag nodig kry vir universiteitstoelating en die loopbaan van jou keuse;
- Affies se personeel is ervare en toegewyd en is bekend daarvoor dat hulle werklik ‘n saak het met ‘n kind;
- Affies se gees kook! Hoendervleis is gewaarborg elke keer wat die skoollied deur die Affies gesing word.
- Affies se akademie is van die beste en ons staan in niks en niemand se skaduwee nie!
- Affies se sport is puik en ons sportmangees pas by nederige wenners. Wanneer ons verloor, probeer ons met waardigheid weer!
WELKOM BY AFFIES!!
Jou ouers kan jou nou reeds by die skool kom inskryf. Moenie te lank wag nie en maak seker van ‘n plek in hierdie great skool.
Onthou asseblief dat jy jou geboortesertifikaat of identiteitsdokument en ‘n oorplasingsertifikaat van jou vorige skool by
inskrywing moet voorlê.
GEAGTE OUERS: Ons skool se visie is om “’n vol, funksionerende en presterende skool vir die Sasolburg gemeenskap“ te wees. Die
mooi getal van 161 graad 8’s het in Januarie 2013 Affies as hoërskool gekies, vergeleke met 145 vir die 2012. Dit beteken dat
Affies steeds die mees verteenwoordigende skool van die Sasolburggemeenskap is en met 96 Afrikaanssprekendes ook die
voorkeurskool vir Afrikaanssprekendes in Sasolburg.
Daar is genoeg bewyse van Affies se prestasies en ons is tevrede in die wete dat ons deel van ‘n funksionele skool is. Oud-Affie
onderwysstudente kom graag terug vir hulle praktiese sessies. Ons geniet elke hoogtepunt en leer uit laagtepunte.
Ons strewe daarna om die beste VIR die wêreld te wees, selfs wanneer ons nie daarin slaag om die beste IN die wêreld te wees nie.
Op hierdie bladsye sal u ‘n beeld kry van dit wat Afrikaanse Hoërskool bied. Dit is ‘n skool waar u kind ‘n gebalanseerde opvoeding
kry met waardes wat vir u belangrik is. Ons wil u uitnooi om u kind by ons in te skryf. Ons onderneem om na sy/haar akademiese
vordering om te sien, om gesonde sport- en kulturele aktiwiteite aan te moedig en u kind tot ‘n volwaardige volwassene te help vorm.
SKOOLDRAG (DOGTERS): Wit hemp met das, turkoois romp, turkoois oortrektrui, grys kniekouse, swart skoene, skoolbaadjie.
Winter: Windbreker, grys skooltrui, grys broekiekouse en romp/skoollangbroek .
SEUNS: Wit hemp & das, turkoois oortrektrui, grys broek, grys kouse, swart skoene, skoolbaadjie. Winter: Windbreker, grys skooltrui
Verskaffers: Sedgars, Vereeniging

Wat Affies alles bied
AKADEMIE
Wiskunde Olimpiade
Amesa-Sasol Wiskundekompetisie
Harmony Wiskunde-olimpiade
Wiskunde- en Skeinat Akademies
Dans, Kuns, Drama
Wêreldkennis Olimpiade
Afrikaans Olimpiade
TechnoX-projekte
Mintek en Sasol Minquiz
Bio-Science olimpiade
TechnoX-projekte
ALGEMEEN
Avontuurklub
Valentynsbal
Leesprogram
Mnr en Mej Affies
Toere
VCSV-kampe
Kampe
Rekenaarsentrums
SPORT
KULTUUR
Tennis
Skoolkoerant
Rugby
VCSV
Netbal
Debat & redenaars Hokkie Hokkie
Koor
Muurbal
Skoolorkes
Krieket
Skaak
Skiet
Gospelgroep
Sokker
Toneel/voordrag
Atletiek
Voortrekkers
Swem
Kunswedstryde
Bergfietsry
Spaanse danse (gesubsideerde
Ringbal
Buitemuurse aktiwiteit)

Akademie
Skoolgaan draai primêr om akademie. Dit gaan goed met ons skool omdat Affies oor ‘n span
toegewyde onderwysers en gemotiveerde leerders beskik. Die kwartaallikse Top 10-funksie is ‘n
prestige geleentheid wat deur die ouers bygewoon word. Hier word erkenning aan die akademiese
toppresteerders in elke graad gegee.
Met ‘n slaagsyfer van 93% het dit goed gegaan met die Matrieks van 2012. 59 onderskeidings is
behaal. 43,54% van leerders het vrystelling vir diplomakursusse, 49,19% van leerders het vrystelling
vir graadkursusse. 92,73% van leerders het dus vrystelling vir verdere studie. Leora Gouws was die
toppresteerder met 8 onderskeidings; sy was onder die top 50 presteerders in die
Vrystaat, 3e op meriete in die Vrystaat en die beste kandidaat in Afrikaans. Drie
kandidate het sewe onderskeidings behaal en een kandidaat vyf onderskeidings.
Die hoof, mnr Kleynhans, dien op die raad van Flavius Mareka FET College.
Affie-onderwysers dien op ‘n verskeidenheid akademiese-, sport- en
kultuurkomitees. Mev. Marina Theron is eksaminator en hoofnasiener vir
Afrikaans sowel as moderator vir Afrikaans Huistaal: vraestel 1,2,3 (SAKAI);
mev. Charlotte Bresser is moderator vir visuele kuns (vraestel 1 & 2) en me
Marika van der Lingen is moderator vir RTT (SAKAI). Verskeie onderwysers
is as nasieners, senior- en hoofnasieners by die gr 12-eindeksamen betrokke.
AFRIKAANS OLIMPIADE: Affies neem jaarliks aan die ATKV-Afrikaans
Olimpiade deel. Leora Gouws behaal die tweedeplek landswyd en word eerste
in die Vrystaat in die Afrikaans Olimpiade (huistaal) geplaas.
HARMONY SA WISKUNDE OLIMPIADE: 7 leerders dring na die 2e rondte (2013)
deur. Affies neem jaarliks aan die SASOL Amesa wiskundekompetisie deel.
BIO-SCIENCE OLIMPIADE 2012: Leora Gouws behaal 86% en Vincent Vermaak 84%. Nog 9 leerders
word met medaljes beloon. In die afdeling vir gr aad 8 & 9 is Johann Hanekom (graad 8) gesamentlik
eerste in die nasionale kompetisie en elf leerders ontvang medaljes.
MINTEK MINQUIZ 2013: Marisa Pienaar is die wenner van die Platinumafdeling.

Akademie
WISKUNDE AKADEMIE: Die akademie is ‘n gratis diens slegs aan Affies. Bywoning is vrywillig en
daar word voorsiening gemaak vir presteerders sowel as vir leerders met behoefte aan ekstra hulp.
Affies bied van 2011 af Addisionele Wiskunde aan. ‘n Jaarlikse wiskunde-deurnag is baie gewild –
Wiskunde by Affies is pret. Mee Thiart, Bekker. Serrao en van Heerden is die wiskundepersoneel.
NATUURWETENSKAPPE: Die skeinat akademie is gratis, bywoning is
vrywillig en daar word vir alle leerderbehoeftes voorsiening gemaak.
DRAMA word as vak by Affies aangebied. Daar word elke jaar in die
eindeksamen topprestasies in die vak gelewer: 7 uit 8 kandidate
behaal onderskeidings in die 2012-eindeksamen.
VISUELE KUNS: Affies se kunsleerders lewer gereeld van die top
prestasies in die Vrystaat. Ons neem jaarliks aan kunswedstryde
deel. Die matrieks se skoolkunsloopbaan word aan die einde van
elke jaar met ‘n kunsuitstalling afgesluit. In die 2013 Vereeniging
kunsfees behaal die Affie-kunstenaars die volgende punte: 8 A sim=
bole, 4 A+ simbole, 5 A++ simbole, 4 B simbole. Agt uit 12 kandidate
behaal in die 2012-eindeksamen onderskeidings in visuele kuns.
TOERISME: Toerisme fokus op kennis, die houding en ontwikkeling van
ons land en sy bronne deur die ontginning en bemarking daarvan. Die
leerders maak kennis met die toerismepraktyk, asook van die werkskeppings=
geleenthede wat dit aan ‘n voornemende entrepreneur bied. Toere en uitstappies word gereeld
onderneem.
LEESSENTRUM: Affies beskik sedert die begin van 2013 oor ‘n rekenaarondersteunde sentrum
waar gr 8 & 9-leerders een periode per week lees. Die leesprogram is op aanbeveling ook vir senior
leerders beskikbaar . Leerders se vordering kan op die internet gemonitor word.
VERDERE ONDERWYS EN OPLEIDING: Affie onderwysers woon elke jaar opleidingsgeleenthede
in al die vakke en leerareas by. Enkele Affie-onderwysers is ook as lid van Nasionale Onderwys se
provinsiale opleidingspan by die opleiding van Vrystaatse onderwysers betrokke.

se
Kultuur
DANS: Affies is die eerste skool in die Vrystaat wat dans as vak aangebied het. Carli
Olivier (PDB), goue medaljewenner op die wêreldkampioenskappe en oud-Affie,
is Spaanse dansonderwyseres by Affies. Verskeie danseresse lê jaarliks die
internasionale Spanish Dance Society eksamens af. By die vorige Vaal Dance
Festival neem hulle aan 8 items deel en behaal agt 95%+ simbole. Affie
dansers neem al 2 jaar aan die openingsitem van SA Skole -atletiek deel.
SKOOLKOERANT: Die Padda verskyn kwartaalliks en word deur die
aspirantjoernaliste van die redaksie moontlik gemaak.
KOOR: Affies het ‘n junior- ensemble.
DIE AFFIE MUSIEKMAKERS speel gospelmusiek en begelei met saal=
opening. “Annie-brand vir Jesus” is ‘n musiekgroep wat geestelike musiek
speel waarvan tieners hou.
GOSPEL GROUP: Die groep gee uiting aan hulle unieke talent om spontaan te
harmonieer en so die Here te prys. Die groep bestaan vanjaar uit 15 lede.
SKAAK: Affies neem vanjaar aan die Sedibeng Hoërskoleliga en die Saddlestoernooi deel.
verskeie toernooie deel: Emerald Casino ope, Eligwa ope, Driehoek ope.
Ons neem aan
TONEEL is belangrik by Affies en ons neem aan kompetisies en kunswedstryde deel: Vrystaat-, Vaaldriehoek-
Vereenigingkunswedstryde en ATKV-toneel. Onlangse prestasies sluit in: 42 A++, 46 A+, 23 A-simbole op die
Vereeniging kunsfees, 7 ATKV-toekennings, Bobaastoekenning, 3 A++ en 1 A+ by die vorige Vaaloewerse
kunswedstryd. Die 2013 Vrystaat kunswedstryd in Bloemfontein lewer die volgende simbole op: 18 A++
simbole, 28 A+ simbole, 21 A simbole, 10 B+ simbole en 4 B-simbole.
DEBAT EN REDENAARS: Die debatsvereniging hou elke kwartaal ‘n byeenkoms waar sprekers meeding. Aan
die einde van die jaar word die beste sprekers aangewys. Die sprekers neem aan die ATKV-redenaarskompetisie
en die Vaaldriehoek debatliga deel. Drie seniorleerders dring deur na die halfeindrondte van die ATKV
redenaarskompetisie. Mee van Zyl en Viljoen tree as ATKV-streeksbeoordelaars op.

Sport
RUGBY
Affies se eerste rugbyspan is onoorwonne in die 2013 Hoërskool Vanderbijlpark sportaandreeks. Die
seniorspan dring na die Valkeliga kwartfinale deur.
Die senior sewesspan eindig 2e in die 2013Frankfort toernooi. Vier Affies word in die Sasolburg dorpspan
ingesluit en speel in ‘n toernooi op Frankfort.
Rholani Ncabuka speel in die 0/18-Cravenweek en is in die 0/19-Curriebekerspan ingesluit.
David Mawilela is in die 0/16-Grant Khomo vyftiental ingesluit. Die 0/15-span het na Bloemfontein getoer.
Affies-rugby is 'n sterk mededinger in die Valkeliga vir mediumskole en die seuns word aangemoedig om
rugby te speel. Ons sien uit na ‘n 0/14 rugbytoer in 2014. Ons seuns oefen weekliks in die gimnasium om
hulle fisies voor te berei vir die volgende seisoen. Word deel van die wenkultuur van Affies-rugby.
NETBAL
Affies neem suksesvol aan die Vanderbijlpark Aandreeks deel. ‘n Netbalkursus word by Konka in Brits
deur Elsje Jordaan aangebied. Drie spelers word na die finale Fezile Dabi-proewe in Welkom genooi.
Teenstanders, maak gereed vir 2014!
KRIEKET
Die eerstekrieketspan het ‘n geslaagde 2012-seisoen gehad en sien uit na ‘n nog beter 2013-seisoen. Affies het
al in die verlede Vrystaat Nuffield- en PG Bisonspelers opgelewer.
Affies se krieketgeriewe is van die beste in die Vaaldriehoek, nl. twee sementnette en vyf turfnette, asook
een krieketveld. Affies was in die verlede en is nog steeds ‘n krieketkrag in die Vaaldriehoek asook in die
Noord-Vrystaat.

Sport
HOKKIE
Affies spog vanjaar met spanne in die Aandreeks, Noordvaal Mediumskolekompetisie en Fezile Dabi-
Liga. Vyf spelers word gekies vir die Fezile Dabispan en twee is in die Noord-Vrystaatspan ingesluit.
Die eerstespan en die o/16-span dring na die tweede rondte van die Noordvaal mediumskole=
kompetisie deur. Affies se seunshokkie groei en lewer goeie resultate. Ons neem elke jaar aan ‘n
binnemuurse reeks deel. Kry jou stok en bal, Affies is reg vir jou !
MUURBAL: Drie spanne word jaarliks vir die plaaslike liga ingeskryf.
ATLETIEK: Die Affies het ‘n suksesvolle 2013-atletiekseisoen agter die rug. Dertig atlete neem
aan die Vrystaatbyeenkoms in Bloemfontein deel; vyf atlete is gekies om die Vrystaat in die SA
byeenkoms te verteenwoordig: Sunél Botha, Michelle Habig, Raymond Thompson, Christiaan
Franke en Saira-Lee Nel. Die volgende atlete kwalifiseer om aan die ASA-byeenkoms deel te neem:
Raymond Thompson, Christiaan Francke, Rindi Rheeder, Sunél Botha, Saira-Lee Nel, Michelle
Habig.
SOKKER: Affies het ‘n aktiewe sokkerspan wat gereeld vriendskaplike- en ligawedstyde speel. Die
span speel in die Kay Motsepekompetisie sowel as die Sasol-, Metropolitan- en Vaalrivier sokkerligas.
SWEM: Tjaart du Toit en Christos Mouratiddes neem op Kroonstad aan die NOVS-gala deel . Tjaart
wen 5 goud-, 1 silwer -en 2 bronsmedaljes op die NVS-swembyeenkoms en 4 goud- en 1
silwermedalje op die Vrystaatbyeenkoms.
TENNIS: Drie spanne het vanjaar vir die Vaalrivierliga ingeskryf. Konri Bekker en Dawie Bekker
verteenwoordig Noord-Vrystaat. Michael Ellis rig vanjaar die Affies af.
BERGFIETSRY: Affies se span is baie entoesiasties en neem gereeld aan byeenkomste deel.
SKYFSKIET: Dit gaan goed met die skiet by Affies. Ons leerders kwalifiseer jaarliks vir provinsiale
kleure en neem in September aan die SA-Kampioenskappe deel.

Algemeen
LEWENSTRATEEG
Affies is die eerste skool wat ‘n lewenstrateeg voltyds in samewerking met Kohin, in diens
geneem het. Me Uzanne Barnard is ‘n gekwalifiseerde berader wat ‘n belangrike funksie by die
skool vervul.
MNR EN MEJ AFFIES
Hierdie glansgeleentheid vind jaarliks plaas. Die finaliste word deur toonaangewende boetieks
geklee, groot name in die vermaaklikheidsbedryf tree as gaskunstenaars op en die hoogtepunt
van die aand is die verskyning van die finaliste in die droomskeppings van ‘n topontwerper.
Groot pryse is op die spel.
DIE VOORTREKKERS
‘n Kultuurorganisasie wat leerders se ontwikkeling met betrekking tot spanwerk,
leierskapontwikkeling, interessante uitstappies, staptoere en kampe daarstel. Ons woon
jaarliks gedurende Aprilvakansies die provinsiekamp te Doornkloof by.
VALENTYNSBAL
Die formele bal, ‘n rooitapytgeleentheid wat jaarliks by Affies gehou word, is een van ons
lekker tradisies.

Algemeen
SOSIALE VERANTWOORDELIKHEID
By Affies is ons deeglik bewus van ons sosiale verantwoordelikheid en kom dit op ‘n lekker manier na:
Affies skenk gereeld bloed. Fondsinsamelings ten bate van bv. die Jeugsorgsentrum en Gesinsorg word
gereeld gehou. Dit neem byvoorbeeld die vorm van ‘n Hoededag of Pantoffeldag aan en word met groot
entoesiasme ondersteun. Kunsleerders het ‘n voortdurende projek om die mure van die
versorgingseenheid van “Ons Gryse Jeug” met muurskilderye te versier.
GODSDIENS
Affies het verskeie Godsdiensgeoriënteerde tradisies: Godsdiensperiodes word op georganiseerde wyse
deur personeel waargeneem en Hemelvaartdiens, Kerssangdiens, Wêreldbiddag vir vroue en ‘n
afskeidsbiduur vir die matrieks is enkele van die tradisies wat vir Affies belangrik is.
VCSV
Die VCSV vergader Dinsdae gedurende pouse, soms almal saam en soms in klein groepe.
Bybelstudie word in groepverband onder leiding van leiers gedoen wat elke jaar nuut gekies word en
opleiding vir hulle taak ontvang. Groepprojekte behels onder andere die jaarlikse blokskilder: kringe
kies ‘n slagspreuk en beeld dit visueel uit. Ons ontvang gereeld gaste. soos Kruiskyk, 90.6 VCR,
KANSA en verskeie predikante vir ogggendopening. Die VCSV loods gedurende die jaar verskillende
projekte soos insamelings vir die kinderhuise en Ons Gryse Jeug. In 2012 was die kringleiers op ‘n uitreik
na Platfontein en ons beplan soortgelyke toere op ‘n jaarlikse basis.
REKENAARSENTRUM
Die skool beskik oor twee moderne, goedtoegeruste rekenaarsentrums.
AVONTUURKLUB
Die baie gewilde avontuurklub onderneem gereeld stap- en roeitoere na ‘n verskeidenheid
bestemmings.
Die groep het vroeër vanjaar die vyfdag Strandloper-roete by Keimond gestap.
VERVOER
Busvervoer is teen ‘n billike tarief vanaf al die woonbuurte in Sasolburg en Vaalpark beskikbaar.

Vakkeuse: Graad 10, 11 & 12
VERPLIGTE EKSAMENVAKKE – GROEP A
AFRIKAANS HUISTAAL
ENGELS EERSTE ADDISIONELE TAAL
LEWENSORIËNTERING
KEUSEVAKKE –GROEP B
KEUSEVAK 1
WISKUNDE
WISKUNDIGE GELETTERDHEID
KEUSEVAK 2
REKENAARTOEPASSINGSTEGNOLOGIE
REKENINGKUNDE
VERBRUIKERSTUDIE
GEOGRAFIE
KEUSEVAK 3
LEWENSWETENSKAPPE
BESIGHEIDSTUDIE
INGENIEURSGRAFIKA EN –ONTWERP
VISUELE KUNSTE
DRAMATIESE KUNSTE
KEUSEVAK 4
FISIESE WETENSKAPPE
TOERISME
SUID-SOTHO
REKENAARTOEPASSINGSTEGNOLOGIE
BESIGHEIDSTUDIE
OPMERKINGS
Minimum vereistes vir toelating tot die
HOËR SERTIFIKAAT: ‘n Nasionale Senior Sertifikaat.
Minimumvereistes vir toelating tot ‘n DIPLOMA:
‘n Nasionale Senior Sertifikaat met ‘n prestasieaanslag van 3
(Gemiddelde prestasie 40%-49%) of beter in vier erkende
NSS 20-kredietvakke.
Minimumvereistes vir toelating tot ‘n
BACCALAUREUS GRAAD:
‘n Nasionale Senior Sertifikaat met ‘n prestasieaanslag van 4
(Bevredigende Prestasie, 50%-59%) of beter in vier vakke gekies uit
die volgende erkende NSS 20-kredietvakke
(wat bekend sal staan as die aangewese vaklys):
Rekeningkunde
Lewenswetenskappe
Besigheidstudies
Wiskunde
Ingenieursgrafika en –ontwerp
Wiskundige geletterdheid
Geografie
Fisiese wetenskappe
Verbruikerstudie
Visuele Kunste
Tale
Dramatiese Kunste