Bediening van die Nagmaal.

Bediening van die Nagmaal.
Woorde wat in bold gedruk is word gewoonlik hardop deur die mense gesê, maar
die leraar kan dit ook namens hulle sê.
Dis gebruiklik om alles wat volg aan die Tafel te sê en te doen. Mense het reeds by
die tafel aangesit en al die plekke is gevul. Die res van die gemeente word later of
in die banke bedien, of kom vorentoe en staan voor die Tafel om bedien te word,
of neem die sitplekke by die Tafel in om bedien te word.
Die leraar moedig eers die mense met een van die volgende uitnodigings
aan om die Nagmaal te gebruik:
Hierdie is die Tafel van ons Here Jesus Christus.
Almal wat in sy Naam gedoop is, ook die kinders, word genooi om aan
hierdie heilige Sakrament deel te hê.
Jesus het gesê: "Kom na My toe, almal wat uitgeput en oorlaai is, en Ek
sal julle rus gee. Neem my juk op julle en leer van My, want Ek is
sagmoedig en nederig van hart, en julle sal rus kry vir julle gemoed. My
juk is sag en my las is lig."
Mat.11:28-30
Dan sê die leraar :
Die Here is hier teenwoordig.
Dit is niks anders as die huis van God nie; dit is die poort van die hemel."
Gen.28:16 en 17.
Laat ons al die sorge van die wêreld agterlaat,
want ons word nou deur die Koning van die heelal ontvang.
Soos die Here Jesus in die nag waarin Hy verraai is, brood geneem het,
so neem ek hierdie elemente van brood en wyn,
om afgesonder te word van hulle daaglikse gebruik,
om nou te gebruik vir hierdie geheimenis;
Die leraar lig die bord en die beker van die Tafel af op en sê:
en soos die Here Jesus gedank en geseën het,
laat ons ook tot God nader
en ons gebede en danksegging voor Hom bring.
Kom ons bid saam:
Dit is ons plig en ons grootste vreugde
om U te eer, om U te prys,
om U te dank en om U te aanbid
op elke plek waar u heerlikheid bestaan,
want groot is die majesteit van u Naam,
Vader, Seun en Heilige Gees,
ewige lewende, barmhartige God.
U het ons uit niks geskape nie
en ons opgetel toe ons in sonde geval het.
U het niks ongedaan gelaat,
totdat U ons die hemel ingelei het,
en ons met die oorvloed van U koninkryk wat steeds uitbrei, geseën het
nie.
Vir al hierdie gawes dank ons U:
vir al die seëninge wat ons sien en vir dié wat onsigbaar is.
Ons dank U dat U graag ons aanbidding aanvaar,
terwyl ontelbare skares in die hemel U reeds vol liefde dien, en sê.
Heilig, heilig, heilig is die HERE van die leërskare,
die hele aarde is vol van sy heerlikheid.
Hosanna in die hoogste.
Geseënd is Hy wat kom in die Naam van die Here!
Hosanna in die hoogste.
Heilige Vader, ons roep na U om te sê:
U is heilig, die allerheiligste,
U en u enigste Seun en u Heilige Gees.
U heerlikheid is oneindig groot.
So lief het U die wêreld gehad dat U u eniggebore Seun gegee het, sodat
elkeen wat in Hom glo, nie verlore sal gaan nie, maar die ewige lewe sal
hê.
Terwyl ons alles onthou wat Jesus vir ons gedoen het,
- die gawes by die eerste Nagmaal,
sy verskriklike vernedering,
die lyding,
die kruis,
die graf,
sy wonderlike verheerliking en verhoging,
die opstanding op die derde dag,
die hemelvaart,
dat Hy aan u regterhand sit,
en weer sal kom in majesteit, -
gee ons nou vir U hierdie gawes wat Uself vir ons geskenk het.
Ons loof U. Ons eer U. Ons dank U,
Here ons God.
O God, stort u Gees oor ons en oor hierdie gawes uit.
Mag deur die werk van die Heilige Gees, die brood en die beker vir ons
die gemeenskap met die kosbare liggaam en bloed van u Christus wees, ,
sodat ons wat daarin deel, nie veroordeel mag word nie,

maar dat ons die volgende sal ontvang:
rein harte,
die vergifnis van sonde,
die gemeenskap van die Heilige Gees,
die skatte van die koninkryk van die hemel,
en die paradys van u teenwoordigheid.
Met een stem,
Vader, Seun en Heilige Gees,
loof ons U, prys ons U, eer ons U en dank ons U.
Ons aanbid U,
nou en vir altyd.
Hoor ons gebed in die Naam van Jesus Christus, wat ons geleer het om te
bid:
Onse Vader wat in die hemele is,
laat u Naam geheilig word;
laat u koninkryk kom;
laat u wil geskied, soos in die hemel net so ook op die aarde;
gee ons vandag ons daaglikse brood;
en vergeef ons ons skulde,
soos ons ook ons skuldenaars vergewe;
en lei ons nie in versoeking nie,
maar verlos ons van die Bose.
Want aan U behoort die koninkryk en die krag en die heerlikheid
tot in ewigheid. Amen.
Broers en susters,
luister na die instellingswoorde van die heilige Nagmaal van ons Here:
Terwyl hulle geëet het,
het Jesus brood geneem,
(die leraar neem brood met beide hande)
en nadat Hy gedank en geloof het,
het Hy dit gebreek,
(die leraar breek die brood)
en gesê,
‘Neem, eet, dit is my liggaam wat gebreek is as volkome
versoening vir al ons sonde.’
Toe het Hy die beker geneem
(die leraar tel die skinkbeker en drinkbeker op),
en gesê: ‘Drink almal hieruit,
want dit is my bloed van die nuwe verbond,
wat vir baie gestort is,
(die leraar skink wyn in die drinkbeker)
vir die vergifnis van al ons sonde.’
Mat.26.26f.
Net hulle wat heilig is, mag wat heilig is ontvang.
Net Jesus Christus is heilig.
En julle wat met Christus Jesus verenig is,
het Hy ook heilig gemaak.
Lam van God, U neem die sonde van die wêreld weg,
ontferm U oor ons.
Lam van God, U neem die sonde van die wêreld weg,
skenk ons u vrede.
Die leraar gebruik Nagmaal.
1 Kor.1.30
Joh.1.29
Die liggaam van Christus is vir jou gegee. Mat. 26.26
Amen.
Die bloed van Christus is vir jou gestort. Mat. 26.28
Amen.
Wanneer almal bedien is en die borde en wynhouers teruggebring is na die
Tafel, sluit die leraar so af:
Ek wil die Here loof, met alles wat in my is, wil ek sy heilige Naam loof.
Ek wil die Here loof en nie een van sy weldade vergeet nie.
Dit is Hy wat al my sonde vergewe, wat al my siekte genees,
wat my red van die graf en my met liefde en ontferming kroon,
wat my die goeie in oorvloed laat geniet,
my die jeugdige krag van die arend skenk.
Here ons God, ons dank U vir ’n vredevolle gemeenskap met U in Christus
Jesus. Gee dat ons hiervandaan verder in gemeenskap met u liggaam sal
lewe en u met ons hele hart, ons hele siel en al ons krag sal liefhê.
Ons bid dit in Jesus Naam, tot u eer, o Vader, deur die krag van u Gees.
Amen.
Ps.103:1-5
Slotsang
Seën:
Die Here sal julle seën en julle beskerm, die Here sal Hom aan julle
bekend maak en julle genadig wees. Die Here sal julle gebede verhoor en
vir julle vrede gee. Deur die genade van ons Here, Jesus Christus, en in
die Naam van die Vader, die Seun, en die Heilige Gees. Amen.