Aswoensdag, Lydenstyd en Paasfees! Aswoensdag word op 22 ...

Aswoensdag, Lydenstyd en Paasfees!
Aswoensdag word op 22 Februarie 2012 gedenk.
Aswoensdag is ’n dag van verootmoediging.
Ons gemeente kom eerskomende Woensdag om 19:00 bymekaar om die dag met ’n erediens te gedenk.
Bybelse perspektief rondom Aswoensdag.
Dis ’n dag van verootmoediging en die eerste dag van die Lydenstyd. In antieke tye is as gebruik as
simbool van rou. Om as op jouself te strooi was ’n uitdrukking van hartseer as gevolg van verlies of van
berou oor sonde. ’n Baie ou voorbeeld hiervan vind ons in Job 42: 6: "…en nou verag ek myself, nou sit
ek vol berou, in sak en as”.
Die profeet Jeremia roep mense op om hulle op hierdie manier te verootmoedig: "My volk, trek rouklere
aan, rol in die as, treur soos oor die dood van 'n enigste kind, huil bittere trane, want die verwoester is op
ons.” (Jer 6:26).Daniel het ook so by God gepleit: "Daarom het ek my na die Here God gewend in gebed
en smeking: ek het gevas, rouklere aangetrek en as oor my kop gegooi.” (Daniel 9:3
’n Ander voorbeeld vind ons in Mat 11: 21 en Lukas 10:13, “As in Tirus en Sidon die wonderdade
plaasgevind het wat in julle plaasgevind het, sou hulle hulle lankal in sak en as bekeer het.” Hebreërs
9:13 en 14 sê: “Wanneer die bloed van bokke en bulle en die as van 'n vers op die onreines gesprinkel
word, maak dit hulle uiterlik rein. Hoeveel te meer sal die bloed van Christus ons gewete bevry van die
las van dade wat tot die dood lei, sodat ons die lewende God kan dien! Hiervoor het Christus immers
Homself as volkome offer deur die ewige Gees aan God geoffer.”
Moses het hom verootmoedig en vir 40 dae gevas nadat Israel die goue kalf gemaak en dit aanbid het.
Aswoensdag is die begin van ’n soortgelyke 40 dae periode (Sondae word nie getel nie) en dit hou
verband met die 40 dae wat Jesus in die woestyn gevas en gebid het voordat Hy sy bediening begin het.
Hoe word Aswoensdag en die Lydenstyd gedenk
Prediking, liedere en gebede by die erediens help ons onthou hoe Jesus vir ons gely, gesterf en
opgestaan het. Baie Christene gebruik ook hulle stiltetyd om na te dink en te bid oor hierdie gebeure en
die persoonlike betekenis van die boodskap vir hulle lewe te ontdek.
Geestelike dissipline wat ’n impak maak op ons lewens kan ons ook help om geestelik te groei, ons
geloof te versterk ons verhouding met God inniger te maak.
Om meer tyd “op te offer” vir ons geestelike lewe, gebed en Bybelstudie, ons gesinne en ons gemeente is
die belangrikste deel van hierdie dissipline. Sommige vind dat dit hulle help om te vas van luukshede
soos byvoorbeeld koffie, suiker, sjokolade, TV en speletjies, om hulle te motiveer om meer fokus en tyd
aan hulle verhouding met die Here te wy.
Protestantse Christene laat die klem op die volgende twee sake val gedurende die Lydenstyd:
* Verootmoediging: Begrip van ons gebrokenheid en ons behoefte aan Christus.
* Voorbereiding: Ons stewe daarna om ons harte oop te maak vir die gedagtenis aan die lyding, dood en
oorwinning van Christus, sodat Paasfees vir ons groter betekenis sal hê en ’n werklike impak op ons
lewens sal maak.
Behou perspektief...
Mens moet oppas vir wettisisme, want dit gaan veral NIE oor die nakoming van reëls of ’n gesindheid wat
God wil beïndruk nie, maar oor die voorbereiding van ons hart vir die Paasboodskap.
Om die lydenstyd te vier is nie ’n Bybelse opdrag nie. Dis net ’n goeie gewoonte wat vir baie eeue
Christene help om nader aan God te kom. En dit behoort gedurende elke seisoen te gebeur.

Aswoensdag en die lydenstyd is ’n geleentheid om geestelik te groei en moet so gedenk word dat dit nie
’n las word nie, maar betekenisvol is en altyd onthou dat ons nie treur oor die lyding van Jesus nie, maar
treur oor ons sonde en terselfdertyd baie bly is oor die oorwinning van ons Heer.