Kliek hier vir die 2013 joernaal - Stamboek

voorwoord
tydens die Junie-vakansie het ek en my gesin die voorreg gehad om deur die land te reis en
verskeie Dormertelers te besoek. Opvallend was die hartlike kuiers, die interessantheid van
die verskillende boerderypraktyke- en klimaatsomstandighede waarin die Dormer floreer.
Ons voer maar deurentyd ‘n stryd met die negatiewe aspekte van mens-wees, van landbouerwees.
Ek dink soms dis nie hoe goed jy boer nie, maar hoe goed jy keer!
dormer 2013
6
Daar was onlangs die nuus oor die beperking van plaasgroottes
wat strydig is met die vryemarkbeginsels.
Dit sal waarskynlik ‘n negatiewe uitwerking op voedselsekerheid
hê, (en ook op beleggers in die landbousektor). So ook met
arbeidsonrus, dieselrabat, geweld, korrupsie en oneweredige
prysstygings. Ek plaas dit maar in alfabetiese orde, want hierdie
gebeure tref elkeen in verskillende grade van ontsteltenis.
Ons kan egter positief voortgaan om produktief en winsgewend
te boer: veilingspryse en aanvraag na Dormers bly hoog.
Landbouers se skulddelgingsvermoë het relatief verbeter omdat
landbouprodukpryse gestyg het en rentekoerse op sy laagste
vlak in sowat vier dekades is.
Landbouers en beleggingsimplikasies in landbou bly steeds
positief. Die wêreldbevolking groei teen ‘n vinnige tempo
en die antwoord daarvoor is verhoogde voedselproduksie
(populasiegewys kom daar blykbaar elke twee jaar lande so
groot soos Suid-Afrika in die wêreld by). Ons as landbouers
speel hier ‘n aktiewe rol in die breë samelewing, en dit vereis
unieke leierskap van ons. Baie dankie aan positiewe raadslede vir
die bestuur van die Dormer Genootskap. In my dienstydperk as
president, is daar nog nooit tydens ‘n raadsvergadering gestem
oor ‘n kwessie nie – alle probleme was uitdagings wat lekker
debattering ontlok het. Die uiteinde was ‘n werkbare oplossing
tot voordeel van die ras.
Al die lede van wie jy in die Landbouweekblad lees, op die
televisie sien, op die radio hoor, kursusse, uitstallings en skoue
wat aangebied is om ons ras te bevorder: baie dankie. Ons
is dankbaar en trots om SA Stamboek en sekretariaat se
professionele dienste te kan gebruik.
Daar is soveel opbouende, leersame inligtingsbronne, dat jy
die beste besluit kan maak deur net vrae te vra, te lees en te
luister. As jy self nie slim is nie, maak jouself ryk met die slim
mense rondom jou. Geniet jou leersame reis, besaai met al die
slim landbouers wat die bakens op jou pad sal wees . . .
Christo Groenewald
President