DIE ROL VAN TAALAKTIVISME BY DIE HERWAARDERING VAN ...

saam te staan en Afrikatale as ’n saak van dringendheid te ontwikkel sodat dit
selfs later as onderrigtaal op tersiêre vlak gebruik kan word (Thabiso P Tsotetsi ’n
leser in City Press, 30 Mei 2004).
Hierdie voorbeelde suggereer dat ’n nuwe tendens besig is om hier vorm aan te neem.
Ook dui die getuienis daarop dat taalaktivisme dus in die Afrikataalsprekende
gemeenskap voorkom, maar dat dit nie deur wat in die literatuur as tradisionele
(taalnasionalistiese) taalbewegings beskou word, aangevuur word nie. Die rolspelers in
hierdie geval is politieke organisasies soos Cosas en die ANC. Hoewel mobilisering van
die massas vir Engelsmediumonderrig in die vorm van optogte en demonstrasies
wydverspreid voorkom, word dit egter in die eerste plek op toegang tot wit skole gerig.
Taal speel, anders as in die geval van die Afrikaanse bewegings, ’n sekondêre rol.
Indien Martel (1999:47) se definisie van aktivisme as beide divers en feitlik
allesomvattend oor aksies wat op verandering gerig is as maatstaf gebruik word, kan tot
die slotsom gekom word dat aktivisme rakende taal van onderrig in Suid-Afrikaanse
skole wel wydverspreid voorkom. Bostock (1988:73) wys egter in sy studie “Assessing
the Authenticity of a Supra-National Language-Based Movement: La Francophonie” op
die dilemma in die assessering van “authenticity or genuineness, validity and entitlement
to acceptance of the various movements, groups, organizations and even nations which
make claims on behalf of themselves and their adherents”. Volgens hom is La
Francophonie ’n beweging wat daarop aandring dat hulle alle pogings in die
ontwikkeling van Frans wêreldwyd verteenwoordig. Alhoewel hierdie beweging wel ’n
duidelike herkenbare beweging is, bestaan dit volgens Bostock (1988) uit ’n aantal
konstituerende organisasies, elk met sy eie onderskeidende doelwitte. Dit, volgens hom,
plaas ’n mate van bedenklikheid oor die egtheid van La Francophonie as ’n super
taalbeweging.
Alhoewel aktivisme vir Afrikaans en Afrikaansmoedertaal-onderrig, volgens die
mediarekords wydverspreid voorkom, moet in ag geneem word dat dit deur ’n wyd
uiteenlopende groep bewegings en organisasies gevoer word. Sommige van hierdie
255