LEWE NA APARTHEID: LIDMATE SE NARRATIEWE VANUIT 'N ...

Hoofstuk 2: Die oorsprong van die apartheidsverhaal
p60
Hierdie navorsing word gedoen vanuit die praktiese teologie en by name die pastorale
terapie. Daarom is ʼn belangrike onderafdeling van die navorsing juis die vraag oor die
rol van die kerk in die kwessies wat in die voorafgaande twee afdelings uiteengesit is.
Wat het die kerk destyds in die apartheidsjare gesê, asook in die tydperk van 1994 tot
1998? Dit vorm die basis van afdeling vier.
Afdeling vyf handel oor wat die kerk sedert die aanvanklike navorsing gedoen en gesê
het oor die situasie in Suid-Afrika. Die fokus is primêr op die NG Kerk, maar ander
stemme word ook gehoor. Hier word uiteraard ook aandag gegee aan stemme van
kritiek.
Die sesde deel van hierdie hoofstuk handel oor die agtergrond van die navorsing oor
Weingarten se Typology of Witnessing (2000). Hierin voer sy aan dat almal in Suid-
Afrika getuies is van wat onder apartheid gebeur het. Die wyse waarop verskillende
mense hierdie getuienis verwoord, verskil egter van mekaar. Sy maak gebruik van ʼn
twee-as sisteem waarin Bewus-Onbewus gekorreleer word met Bemagtig-Ontmagtig.
Die gevolglike vier kwadrante bepaal dan die perspektief van waaruit gekyk word na
apartheid en die gevolge van die beleid (Weingarten 2002:45). Die mede-navorsers se
insette sal hieraan gemeet word.
Die sewende deel van die hoofstuk kyk na die proses van verandering. Eerstens word
gekyk na Bridges en Mitchell (2000) se drie-fase model van verandering en word
Rendle (2009) se roller coaster of change-model verduidelik. Rendle gebruik hierdie
model om visueel voor te stel hoe die proses van verandering lyk. Sy navorsing oor
“the emotional cycle of congregations in change” (Rendle 1998:105) is relevant vir, en
van toepassing op die proses waardeur baie wit Christen Afrikaners in Suid-Afrika ook
kollektief gaan. In afdeling sewe word hierdie model volledig verduidelik.
Hoofstuk twee word afgesluit met 'n samevatting van die inhoud van die hoofstuk en 'n
oorsig oor wat in hoofstuk drie aan die orde gestel word.