LEWE NA APARTHEID: LIDMATE SE NARRATIEWE VANUIT 'N ...

Opsomming
p722
Lewe na apartheid: Lidmate se narratiewe vanuit ’n longitudinale pastorale
betrokkenheid
Opsomming
Hoe leef wit Afrikaanse Christene in die post-apartheid Suid-Afrika? Dit is die
vraag wat in hierdie longitudinale navorsing ondersoek word. Die mede-navorsers
is ʼn groep wit lidmate van die NG Kerk Welkom-Suid wat oor ʼn tydperk van
veertien jaar (1998-2012) twee keer die geleentheid kry om hulle self-narratiewe te
vertel. Die studie gebruik die onthullings voor die WVK as agtergrond waarteen die
mede-navorsers hulle eie verhale kan vertel. Die temas wat prominent na vore
kom is wit mense se siening van apartheid, skuld en skuldbelydenis, versoening
en die rol van die Kerk. As gevolg van die narratiewe aard van die verslag word dit
volgens die ABDCE-model aangebied.
Hoofstuk een is die verhaal van aksie. Dit vertel van die 1994 politieke oorgang en
die daaropvolgende WVK. Die verslag word hier geplaas binne die praktiese
teologie en wel binne ʼn postmoderne paradigma. Die sosiale konstruksie diskoers
word bespreek asook die metodologie wat gevolg word. Die metode wat gevolg is
in die aanvanklike- en opvolgnavorsing, word verduidelik asook die oorsprong van
die transkripsies wat as bylae aangeheg word.
Die tweede hoofstuk is ʼn verhaal ter agtergrond en fokus op die agtergrond en
oorsprong van apartheid soos gesien deur die mede-navorsers. Hierna word
gekyk na die veertien jaar voor die opvolgnavorsing. Aan die hand van die woorde
onseker, ontnugter, opgewonde en oneerlik word die mede-navorsers se sienings
weergegee. Die posisie van die Kerk word ook in twee afdelings weergegee: eers
die tydperk voor 1998 en dan wat sedertdien gebeur het. Laastens word twee
modelle beskryf as lense waardeur die transformasieproses beskou kan word.
In hoofstuk drie (ʼn verhaal van ontwikkeling) kom die mede-navorsers baie meer
direk aan die woord. Aan die hand van korter en langer uittreksels uit die
transkripsies word elkeen se posisie beskryf. Die vraag word pertinent gevra na
die kernprobleem van apartheid soos gesien deur wit oë. Die deelnemers reageer