LEWE NA APARTHEID: LIDMATE SE NARRATIEWE VANUIT 'N ...

HOOFSTUK 2
DIE OORSPRONG VAN DIE APARTHEIDSVERHAAL
(ʼn Verhaal ter agtergrond) 10
Ek was meer as een keer in 'n situasie waarin ek probeer antwoorde
gee het, maar terwyl ek gepraat het, het ek self al minder oortuig
geraak. In gesprek met belangstellende buite-staanders het ek al
minder geweet wat die antwoorde is. In die proses van die vertel van
die verhaal het ek ontdek dat my storie al minder sin maak (Müller
2000a:20).
1. Inleiding
Hoeveel sin maak die verhaal wat wit Christen Afrikaners hulleself vertel het? Hoeveel
sin het dit gemaak vir ander mense wat dit gehoor het? Müller (2000a:2) onderstreep
die punt dat sy eie antwoorde hom al minder oortuig het, totdat hy op dié punt in sy
lewe gekom het waar sy “storie al minder sin (ge)maak” het. Vir hom as wit Christen
Afrikaner het dit tot 'n “waterskeidingsmoment” gelei. Sou dit ook só wees by ander wit
Christen Afrikaners? Watter verhale vertel hulle vandag, agttien jaar na die amptelike
einde van apartheid, en hoe verskil hierdie verhale van dié wat hulle veertien jaar
gelede vertel het? Maak hierdie verhale sin en hoe moet dit beoordeel word? Dit is die
kwessies wat in hierdie navorsing aandag kry. Hierdie hoofstuk fokus op die agtergrond
waarteen hierdie verhale vertel en vrae gestel word.
Soos in hoofstuk een verduidelik is, word hierdie navorsingsverslag aangebied volgens
die ABDCE-model van Müller, Van Deventer en Human (2001). In hoofstuk een is die
A, die verhaal van aksie (action) vertel. Dáár is aangetoon waarom wit Afrikaanse
Christene se lewens in die nuwe Suid-Afrika die onderwerp van hierdie studie gemaak
is. Gegewe hulle geskiedenis en die onthullings voor die WVK (TRC 1998a) was daar
in 1998 verskeie uitdagings op hulle pad. Die gebeure die afgelope veertien jaar het
eweneens ʼn invloed gehad op die lewe van wit Christen Afrikaners vandag.
Die tweede deel van die model, die B-komponent, vertel ʼn verhaal ter agtergrond
(background) vir hierdie studie. Hierdie agtergrond-perspektiewe word hier in hoofstuk
twee aan die orde gestel. Volgens die voorgestelde vrae wat Müller, Van Deventer en
10 Met verwysing na die tweede deel (background) van Müller, Van Deventer en Human (2001) se
ABDCE-model.