LEWE NA APARTHEID: LIDMATE SE NARRATIEWE VANUIT 'N ...

Hoofstuk 1: Apartheid onder die loep geneem
p54
Die meerderheid van die mede-navorsers kom uit 'n bogemiddelde sosiaalmaatskaplike
groep. Die meeste van hulle is professionele beroepsmense. Dalk sou 'n
ander groep mense se verhale dramaties anders gewees het, maar daaroor kan ek my
nie uitspreek nie. Dit sou die onderwerp van 'n ander navorsingsprojek kon wees. Ook
wat die aantal deelnemers aanbetref sou verdere navorsing die verhale van ʼn groter of
selfs kleiner groep mede-navorsers kon versamel. ʼn Kleiner of groter groep se
interaksie sou dalk ander verhale na vore laat kom het. Of die verhale in wese veel
anders sou wees, kan ek nie op hierdie stadium sê nie.
Die navorsing is in terme van die beskikbare tyd beperk tot sekere kwessies. Dit
beteken noodwendig dat ander uitgelaat moes word. 'n Ander navorser sou deur te
fokus op ander kwessies 'n verdere bydrae tot die korpus van kennis kon maak.
Laastens moet ook gemeld word dat die navorser se eie tekorte ook kon bygedra het
tot die beperkte waarde van die studie. Met meer ervaring sal beter gesprekke gevoer
kan word wat dalk beter resultate sou kon lewer.
11. Hoofstuk-uiteensetting
Hierdie eerste hoofstuk het 'n oorsig gegee oor die probleem. In Lamott (1995) se taal
was dit die aksie (action) wat aanleiding gegee het tot die navorsing. Dit verduidelik
waarom die situasie my aangespreek het en hoe ek te werk gegaan het om dit te
ondersoek. Hier is ook uitvoerig aandag gegee aan die paradigma, epistemologie en
metodologie van die navorsing en 'n beskrywing van die plasing binne die praktiese
teologie.
In hoofstuk twee word die agtergrond (background) van die navorsingsprobleem
ondersoek. Die hoofstuk verduidelik “what was going on before the opening of the
story” (Lamott 1995:62). Hier word gekyk na die apartheidsagtergrond waarteen die
navorsing afspeel, die ontstaan en bedryf van apartheid in Suid-Afrika en die rol van
die NG Kerk daarin. Daar word ook gekyk na wat reeds op die terrein van die praktiese
teologie gepubliseer is oor apartheid en die nuwe Suid-Afrika. Twee belangrike fasette
wat aandag kry is Weingarten (2002) se model van (on)magtig en (on)bewus en
Rendle (2009) se Roller coaster of change.