LEWE NA APARTHEID: LIDMATE SE NARRATIEWE VANUIT 'N ...

Hoofstuk 1: Apartheid onder die loep geneem
p27
quite vividly the confusion when I started to encounter the myriads of definitions,
approaches, themes, motives, and objects of study that all went under the big umbrella
of practical theology.” Met hierdie standpunt van Ganzevoort kan ek heelhartig
identifiseer. Dit verwyder egter nie die noodsaak om hierdie studie enersyds binne die
praktiese teologie en andersyds binne die vakgebied van die pastoraat te posisioneer
nie. Die feit dat “others in practical theology use the same name for a whole different
game” (Ganzevoort 2009:1) onderstreep die behoefte aan 'n behoorlike verantwoording
ten opsigte van paradigma, epistemologie en metodologie. In die volgende afdeling
word hierdie sake aan die orde gestel.
Guba en Lincoln (1994:107) gee die volgende definisie van 'n paradigma:
A paradigm may be viewed as a set of beliefs (metaphysics) that deals
with ultimates of first principles. It represents a worldview that defines
for the holder, the nature of the ‘world’, the individual’s place in it and
the range of possible relationships to that world and its parts...
Die konsep paradigma in sy kontemporêre betekenis kan terug herlei word na die werk
van Thomas Kuhn (1962). Vir hom het paradigma gedui op 'n stel gebruike wat 'n
bepaalde wetenskaplike dissipline op 'n gegewe moment definieer. Hy verwys dan
onder andere na wetenskaplikes soos Newton en Darwin wie se werk 'n bepaalde
manier van denke en wetenskaplike ondersoek in die daaropvolgende era tot stand
gebring het.
Twee dekades later munt Handa (1987) die term sosiale paradigma vir gebruik in die
sosiale wetenskappe. Hiermee verwys hy na 'n tipe wêreldbeeld, die Duitse
Weltanschauung, dit wil sê ʼn stel ervarings, gelowe, waardes en so meer wat 'n
persoon se realiteit bepaal en hoe die persoon op hierdie realiteit reageer. Tans word
dit gedefinieer as “A set of assumptions, concepts, values, and practices that
constitutes a way of viewing reality for the community that shares them, especially in an
intellectual discipline” (The American Heritage Dictionary 2004).
'n Paradigma bepaal die navorser se werkswyse en die manier waarop sy of haar
kennis van waarheid gestruktureer word. Janse van Rensburg (2000:1) sê in sy
definisie dat 'n paradigma ʼn persoon se denk- en verwysingsraamwerk is en dat dit ook
die vertrekpunt is wat denke en dade bepaal.