LEWE NA APARTHEID: LIDMATE SE NARRATIEWE VANUIT 'N ...

Hoofstuk 5: Die post-apartheid verhaal?
p322
verskillende vlakke goed doen om hierdie knelpunte behoorlik aan te spreek.
Onder die sambreelterm Afro-pessimisme word menige probleem ingedruk. Afrika het
nie ʼn goeie geskiedenis as dit kom by die bestuur van die onderskeie lande ná
onafhanklikheid nie. Dit is gewoonlik hierdie mislukkings wat aangevoer word as redes
waarom mense bekommerd is oor die toekoms in Suid-Afrika. Dit is veral sake soos
nasionalisering, die herverdeling van landbougrond [vergelyk Isak 14-439] en die
voorbeeld van die buurland Zimbabwe [vergelyk Karin 11-320] wat wit Suid-Afrikaners
bekommerd maak. In reaksie op ʼn koerantberig dat die ANC nie verstaan waarom
sommige mense die land wil verlaat nie (Pretorius 2011:elektroniese bron), skryf ʼn ene
Yolande Kruger (skuilnaam): “Natuurlik is ons bang, kyk waar het Zim geëindig... alle
harde werk van Boere en die mense se plase wat hy [Julius Malema] wil onteien en
ook banke nasionaliseer? Wat sal met ons ekonomie gebeur?” Haar woorde word
verskeie male deur ander lesers beaam. Dit blyk ʼn kommer te wees wat wyd algemeen
voorkom.
Hiermee saam is daar ook groot kommer oor die ondermyning van die regstelsel.
Vroeër is daar reeds gewys op die vervolging van president Zuma wat gestaak is op ʼn
manier wat baie vrae laat ontstaan het oor die onafhanklikheid van die
vervolgingsgesag. Kommer word dikwels uitgespreek oor die waarde wat aan die
voorskrifte van die Grondwet gegee word. In hierdie verband is die woorde van Reuel
Khoza, voorsitter van Nedbank insiggewend: “Suid-Afrika word wyd erken vir sy liberale
en verligte Grondwet, tog sien ons die opkoms van ’n vreemde tipe leierskorps wat
vasberade is om die oppergesag van die reg te ondermyn en die Grondwet te omseil”
(Lamprecht 2012:elektroniese bron). Nog ʼn gesaghebbende wat ʼn soortgelyke
uitspraak maak, is Dr. Mamphela Ramphele. In April 2012 sê sy onder andere: "South
Africans have much to worry about… The tide towards a closed, unaccountable and
corrupt state is too strong for the few who dare to stand up to be counted. Strength in
numbers is needed" (Ntsaluba 2012:elektroniese bron). Dit is hierdie tipe uitsprake wat
wit Afrikaners laat wonder oor hulle toekoms in Suid-Afrika; en nie net hulle sʼn nie,
maar ook dié van die volgende geslag.