LEWE NA APARTHEID: LIDMATE SE NARRATIEWE VANUIT 'N ...

HOOFSTUK 5
DIE POST-APARTHEID VERHAAL?
(ʼn Verhaal van ʼn einde) 38
In my eie apartheidsverhaal kon ek ervaar hoe ek met verloop van tyd
vorder van storytelling tot storymaking. Deur die verhaal te vertel aan
simpatieke maar kritiese luisteraars, kon ek self 'n nuwe storie oor my
apartheidsverlede vertel wat my toelaat om aan 'n beter toekoms te
werk... Ek het vroeër reeds met my verstand besef dat ons foute
gemaak het en dat daar verandering moes kom. Maar as deel van
daardie groep Christene in 'n vreemde land het dit 'n emosionele
belydenis geword wat ek ook in 'n groepgesprek uitgespreek het. Ek
glo dit was 'n waterskeidingsmoment in my eie houding en siening van
die situasie in ons land (Müller 2000a:20,21).
1. Inleiding
Hoeveel “waterskeidingsmomente” daar in die lewe van die mede-navorsers en ander
wit Afrikaners oor die afgelope paar jaar was, bly ʼn ope vraag. Dit is hierdie
onsekerheid wat maak dat die titel van die hoofstuk doelbewus eindig met ʼn
vraagteken. Hierdie hoofstuk is inderdaad bloot net ʼn verhaal van ʼn einde en geensins
dié verhaal van ʼn einde nie. Ander groepe sal ander post-apartheid verhale kan skryf
en jare van nou af gaan die betrokkenes hopelik ʼn beter verhaal oor die nalatenskap
van apartheid skryf. Beter, in die sin dat daar meer begrip is vir wat apartheid aan swart
mense gedoen het; die nalatenskap van daardie tyd met meer insig hanteer is, en dit
goed gaan met die versoening tussen swart en wit.
Hopelik sal elke betrokkene daagliks ʼn beter ending-verhaal skryf, want daar gebeur
daagliks dinge wat ʼn impak het op die interaksie tussen wit en swart mense. Juis omdat
die verhaal van post-apartheid Suid-Afrika ʼn voortgaande verhaal is, was dit nodig om
ʼn afsnypunt te kies vir hier die navorsing. Die jaar 2012 is gekies omdat dit saamval
met die vyftigste bestaansjaar van die NG Kerk se Algemene Sinode. Gesien in die lig
van die onderwerp van hierdie studie, is 2012 dus ʼn baie betekenisvolle datum. Dit kom
ook in die verslag aan die orde wanneer gekyk word na die jongste besluite van die
Algemene Sinode. Dit was ook nodig om vanuit ʼn pragmatiese hoek ʼn afsnypunt te kies
ter wille van die afhandeling van die verslag. Die datum wat hiervoor gekies is, is die
38 Met verwysing na die vyfde deel (ending) van Müller, Van Deventer en Human (2001) se ABDCEmodel.