LEWE NA APARTHEID: LIDMATE SE NARRATIEWE VANUIT 'N ...

Hoofstuk 4: Die verhaal oor apartheid – teenswoordige tyd
p231
Oor die rol van die NG Kerk, destyds en nou, was daar by die mede-navorsers
oorwegend ʼn negatiewe houding. Selfs diegene wat positief was oor die NG Kerk, het
hulle bedenkinge uitgespreek.
4.5.2 Die NG Kerk in post-apartheid Suid-Afrika
Ná die verskyning van Kerk en Samelewing het die NG Kerk die morele verpligting
(Botman & Petersen 1996:124) gehad om sy lidmate op te roep om te bely. Die medenavorsers
was egter van mening dat dit nie juis gebeur het nie. Danie [13-339] se
mening is Ek dink die kerk speel geen rol nie en later ek sien niks
nie [Danie 13-367]. Isak [14-360] is van mening die kerk het op ʼn manier ʼn
groot geleentheid laat verbygaan dalk om regtigwaar ʼn verskil te
kan maak.
George praat oor die NG Kerk se gebrek aan leiding aan lidmate oor hoe om in die
nuwe situasie in Suid-Afrika te leef. Hy het nie ʼn probleem met die NG Kerk se
amptelike skuldbelydenis en onderneming om positief deel van die toekoms te wees
nie, maar soos hy sê:
die aksie om daai versoening te bewerkstellig is nie
daar nie. Ek meen soos jy tereg sê as ek nou die
regte woord daarvoor het, die beleid wat die kerk
daaroor wil het, dit is daar. Die sinode het
besluit, die sinode het kommissies en dies meer, so
dit is in plek, maar die praktiese deur na my vlak
toe dit gebeur nie, daar is nie voldoende leiding in
die verband nie [George 15-471]
Johan [17-190] is dit eens dat die beleid nog nie op grondvlak uitgekom het nie en
daarby het hy ook ernstige bedenkinge oor sommige van die NG Kerk se leiers: Kerk
se rol in versoening: Nie veel het gebeur, behalwe lippetaal,
tensy dit op individuele gemeentevlak gebeur het nie. Daar sal
ook nie veel gebeur as ons woordspelers soos X [naam van ʼn
prominente kerkleier verwyder ter wille van sensitiwiteit] in
leiersposisies het nie.