LEWE NA APARTHEID: LIDMATE SE NARRATIEWE VANUIT 'N ...

Hoofstuk 4: Die verhaal oor apartheid – teenswoordige tyd
p184
dan voorbeelde gee van wat hy dink apartheid behels het, is dit sake soos dat ’n
blanke man en ’n anderskleurige vrou mag nie saam voor in ’n
bakkie gery het nie [Mike 10-245] en Ek kon nie in die dorp in gaan
en daar staan slegs blankes en ek vat swart mannetjie aan die
hand en sê kom saam hier in nie... [Mike10-267].
Mike [15-165] is nie alleen in hierdie siening van sake nie. George [15-165] neem ʼn
soortgelyke posisie in as hy sê:
Ek dink die feit dat dit op die wetboek gestaan het,
dat dit ʼn soort van ʼn ding was wat op die wet
gestaan het, dit moet so gedoen word. Daar is aparte
geriewe, daar is aparte banke en daar is aparte
ingange en daar is dit en dat... Dat jy ook nie...
ek meen daar was ʼn wet teen gemengde huwelike, die
ontugwet en al sulke tipe dinge.
Later sou George [15-175] praat oor sy hengse jammer gevoel vir mense wat
gedwonge verskuiwings moes ondergaan, maar hy volstaan met die probleem was
omdat dit verpligtend was, omdat dit op die wetboek gestaan het
[George 15-578]. Ook Karin [18-066] steun hierdie standpunt.
Daar kan begrip wees vir hierdie siening van wit mense dat die enigste probleem met
apartheid was dat dit op die wetboek gestaan het. Die uitgangspunt hier is duidelik een
wat redeneer dat diskriminasie in elk geval gebeur het en nog steeds gebeur; Suid-
Afrika het dit bloot ʼn wet gemaak. Bell (2001:13) voer apartheid se oorsprong terug na
“the age of slavery” en koppel dit dan ook aan “the South Africa Act of 1909” waarin wit
dominansie in Suid-Afrika verseker is. Hy gaan voort: “When the National Party
assumed parliamentary control of South Africa in 1948, it had only to refine and further
codify a practice of racial discrimination that was already entrenched.”
Hierdie beperkte siening van wat apartheid behels het, het groot implikasies vir die
vraag na skuld en regstelling. Wanneer daar later na skuld gekyk word, word die
implikasie van hierdie standpunt verder ondersoek.