LEWE NA APARTHEID: LIDMATE SE NARRATIEWE VANUIT 'N ...

HOOFSTUK 4
DIE VERHAAL OOR APARTHEID – TEENSWOORDIGE TYD
(ʼn Klimaks in die verhaal) 27
My spiritualiteit was heeltemal te veel op die persoonlike vroomheid
ingestel. Ek was te lank blind vir die verskriklike magtelose en
uitsiglose toestand waarin soveel mense in Suid-Afrika moet leef en
werk. Daaroor voel ek skuldig (Müller 2000a:23).
1. Inleiding
In hierdie hoofstuk kom die resultate van die opvolgnavorsing aan die orde. Veertien
jaar na die aanvanklike navorsing waaroor in hoofstuk drie verslag gedoen is, is
dieselfde mede-navorsers weer uitgevra oor dieselfde temas as vroeër. Hierdie
hoofstuk rapporteer die resultate van hierdie longitudinale studie waarin die twee
ondersoeke met mekaar vergelyk is. Die titel van die hoofstuk Die verhaal oor apartheid
gee dan ook te kenne dat hier ʼn verhaal vertel word van mense wat van buite na die
fenomeen van apartheid kyk. Hierdie hoofstuk gee ook nie voor om die klimaks van die
verhaal te wees nie, bloot net ʼn klimaks in die verhaal. Ander apartheidsnarratiewe kan
ander klimakse hê wat nie hierdie perspektief ongeldig of irrelevant maak nie.
Soos in die vorige hoofstuk word bepaalde aspekte van die lewe van wit Afrikaanse
Christene in ʼn post-apartheid Suid-Afrika in hierdie hoofstuk gekarteer. Die medenavorsers
se narratiewe word hier byeengebring en volgens soortgelyke temas as in
die vorige hoofstuk aangebied. Hierdie narratiewe word weereens gemeet aan en
vergelyk met ander plaaslik en internasionaal gepubliseerde bronne, en van rolspelers
van verskillende rasse. Aangesien Suid-Afrika ʼn land in oorgang is – van ʼn bedeling
van geïnstitusionaliseerde rassisme en rassediskriminasie na ʼn vrye demokrasie – is
die klem in die navorsing op die verhouding tussen swart en wit. Die temas konsentreer
op aspekte wat hierdie rasseverhoudings affekteer; die oorhoofse tema is een van
versoening met die gepaardgaande aspekte van rassisme, skuld en die rol van die
kerk. Hieruit spruit ook die ondersoek na skuldbelydenis en regstellende aksie.
27 Met verwysing na die vierde deel (climax) van Müller, Van Deventer en Human (2001) se ABDCEmodel.