LEWE NA APARTHEID: LIDMATE SE NARRATIEWE VANUIT 'N ...

Hoofstuk 3: Die verhaal oor apartheid – verlede tyd
p120
2. “Geblinddoek deur die lewe” 18
Apartheid was baie “suksesvol” ten opsigte van die primêre doelwit naamlik om die
verskillende rasse apart te hou. Dit is daarom te verstane dat daar (ten minste) twee
perspektiewe op apartheid sal wees. In hierdie hoofstuk word gekyk na die wit,
Afrikaanse, post-apartheid perspektief op hierdie fenomeen wat ons as apartheid ken.
Hierdie opinies is soos dit in 1998 uitgepreek is deur ’n groep wit Afrikaanse Christene,
ongeveer vier jaar na die formele beëindiging van die apartheidsera. As sodanig is dit
terugskouend. Aangesien die tydsverloop nog redelik kort is, veronderstel ek dat die
menings uitgespreek waarskynlik baie dieselfde is as die menings wat gehuldig is
gedurende die tyd van apartheid.
Die wit Afrikaner se perspektief op apartheid, soos dit in hierdie navorsingsverslag na
vore kom, sal waarskynlik aanduidend wees van hoe meer wit Afrikaners gedink het en
miskien nog steeds dink oor die politieke beleid van die NP van byna vyf dekades. Die
bedoeling is nie om te beweer dat alle wit Afrikaanse Christene so dink of gedink het
nie.
Die verslag sal kyk na die opinies wat die mede-navorsers in die gesprekke
uitgespreek het, asook die geskrifte van ander en die wisselwerking tussen hierdie
twee. Dit ondersoek ʼn wit Afrikaanse perspektief op apartheid van beide ondersteuners
en teenstanders van die beleid. Die menings uitgespreek deur mede-navorsers sal
ondersteun en uitgedaag word deur ’n oorvloed literatuur wat oor hierdie onderwerp
beskikbaar is, uit wit en swart geledere. In hierdie hoofstuk beperk ek myself
hoofsaaklik tot die literatuur wat beskikbaar was ten tye van die oorpronklike gesprekke
en die opskryf van die proses.
Die definisies wat van apartheid gegee word en die verstaan van die implikasies
daarvan sal ondersoek word in die lig van veral die afgryslike onthullings by die WVK.
Die bedoeling is nie, en was ook nooit, om dit krities te evalueer of om dit op elke punt
uit te daag nie. Hierdie hoofstuk beskryf hoe die mede-navorsers, ongeveer vier jaar na
die einde van apartheid, apartheid gekonstrukteer het in hul eie gedagtes. Die WVK
onthullings wat reeds bekend is aan die mede-navorsers, dien alreeds as ’n uitdaging
van hulle bestaande posisies. Dit is hierdie onthullings wat medebepalend sal wees vir
18 Hierdie beskrywing verwys na ʼn opmerking van Frans [1-462] dit voel vir my ons het
geblinddoek deur die lewe gegaan.