LEWE NA APARTHEID: LIDMATE SE NARRATIEWE VANUIT 'N ...

HOOFSTUK 3
DIE VERHAAL OOR APARTHEID – VERLEDE TYD
(ʼn Verhaal van ontwikkeling) 17
As jong dominee was ek meer in gesprek met my eie mense as met
lede van die swart gemeenskap of selfs die nie-Afrikaanse
gemeenskap. Ek het lid geword van die Afrikaner Broederbond en ek
onthou hoe ek in vele gesprekke die saak van die Afrikaner en die
morele regverdigbaarheid van apartheid vurig verdedig het (Müller
2000a:21).
1. Inleiding
Soos reeds in hoofstuk een verduidelik, volg hierdie navorsingsverslag die ABDCEmodel
van Müller, Van Deventer en Human (2001). Hierdie derde hoofstuk fokus dus
op die aspek van ontwikkeling (development) van die navorsing. Die kern van die
navorsing word hier deur verskillende narratiewe byeengebring. Die apartheidsverhale
soos vertel deur die mede-navorsers word deurlopend getoets aan die literatuur en aan
swart stemme wat uiteraard ʼn ander siening van apartheid huldig. Die navorsing poog
om alle stemme wat relevant is vir hierdie studie te hoor.
In lyn met die aard van narratiewe navorsing word die self-narratiewe van die medenavorsers,
sowel as die insette van die navorser self, as gelykwaardig aan die ander
geskrewe bronne wat benut word, beskou. Die menings uitgespreek deur die lede van
die groep dra dus, vir die doel van hierdie verslag, net so veel gewig as die ander
bronne.
Die mede-navorsers het ook geleentheid gekry om op mekaar se standpunte te
reflekteer en kritiese vrae te vra. Na elke gesprek het die mede-navorsers ʼn
transkripsie ontvang van die vorige gesprek. Hulle kon dan daarop reflekteer en verder
met mekaar in gesprek tree oor die temas wat aangeraak is. Ek het ook die
transkripsies met ander persone gedeel wat dan daarop gereageer het. Hierdie
reaksies het ek dan saamgeneem na die volgende groepsgesprek waar dit soms direk
te sprake gekom het. As navorser het ek self ook, na aanleiding van die transkripsies,
kritiese opmerkings gemaak oor wat in sommige gesprekke gesê is.
17 Met verwysing na die derde deel (development) van Müller, Van Deventer en Human (2001) se
ABDCE-model.