LEWE NA APARTHEID: LIDMATE SE NARRATIEWE VANUIT 'N ...

Hoofstuk 2: Die oorsprong van die apartheidsverhaal
p94
Westerse enklawe in donker Afrika gebly het.
Al hierdie sentimente is ʼn verlange na iets wat nooit werklik bestaan het nie. Benewens
die afsondering waarin die verskillende volke geleef het, het mense ook baie
selektiewe geheues. In sy koerantartikel tydens die eeuwisseling kyk Venter
(2000b:elektroniese bron) terug na 1986 en herinner die lesers aan die werklikheid wat
toe geheers het. Ek haal vryelik aan uit sy artikel: Dit was ʼn tyd van noodtoestande en
verpligte militêre diensplig, meer as 64 000 swart mense is daardie jaar verskuif uit
sogenaamde wit kolle en in die plakkerskampe Crossroads en KTC op die Kaapse
Vlakte het ʼn oorlogsituasie geheers waarin 60 mense dood is en 7000 dakloos gelaat
is. Meer as 220 gevalle van terreur is aangemeld, 3 989 mense is om politieke redes
sonder verhoor aangehou en 1 290 het in politieke geweld gesterf. Agente van die
staat, soos die Coetzees en De Kocks en andere het “politieke staatsmoord” gepleeg.
In terme van Suid-Afrika se verhoudings na buite het dit nie veel beter gegaan nie.
Daar was olie- en sportboikotte en reisbeperkings op Suid-afrikaners. Die Amerikaners
het omvattende handelsanksies ingestel en agt-en-veertig Amerikaanse maatskappye
het reeds uit Suid-Afrika gedisinvesteer. Die uitvoer van Krugerrande na Europa en die
VSA is verbied en die VN het verpligte wapensanksies teen die land gehandhaaf. In
1986 alleen het Suid-Afrika 6 717 kundiges deur emigrasie verloor.
Die misdaadtoneel was skokkend. Venter (2000b:elektroniese bron) sê:
Ondanks hardhandige strawwe waar 121 mense opgehang is vir
halsmisdade en 40 288 mense lyfstraf gekry het, het geweldmisdaad
hoogty gevier. In daardie jaar [1986] is 8 959 moorde gepleeg, 39 302
rooftogte uitgevoer, daar was 16 000 verkragtings, 166 000 huisbrake,
123 000 ernstige aanrandings en 48 000 motors is oraloor gesteel.
Hierdie syfers sluit nie eens die ou TBVC-lande in nie.
Mense wat terugverlang na die “goeie ou dae” sal weer moet gaan kyk na presies wat
dit is waarna hulle verlang. Dalk is die hunkering na iets wat nooit werklik bestaan het
nie, maar kunsmatig aan die wit bevolking voorgehou is. Die situasie binnelands was
duidelik nie een van voorspoed en vrede nie en die buitelandse voorbeeld moet as
waarskuwing dien vir wat ook hier plaaslik kon gebeur het. Die nuwe, post-apartheid
Suid-Afrika is duidelik nie so sleg as wat dit kon wees nie.