hjirre - Iepenloftspul Dronryp

De kommisje
Wa sitte der yn de kommisje en wat dogge sy
allegearre? Hjirûnder kinnen jim it lêze.
Namme: Baukje Hofman
Leeftyd: 25 jier
Wenplak: Menaam
Deistich wurk: wurket as projekt meiwurker hantlieding,
ôfdieling Product Management by GEA
Royal de Boer. Mei freon boufakster yn
eigen klushûs en hâldt der fan om leuke
aktiviteiten te ûndernimmen mei freonen.
Kommisjelid sûnt: septimber 2010
Funksje: PR en Kommunikaasje
Hoe bist begûn? Jelly Steenstra (de foarige skriuwster) hat
my frege.
Wat fynst it leukste oan it Iepenloftspul?
De goeie sfear dy’t der hinget. Mei syn
allen der wat moais fan meitsje.
Namme: Grea Bos
Leeftyd: 20 jier
Wenplak: Wjelsryp
Deistich wurk: studearret Small Business & Retail
Management oan de Stenden Hogeschool
yn Ljouwert. Dêrneist wurket se yn de
HEMA yn Snits.
Kommisjelid sûnt: dit jier
Funksje: PR
Hoe bist begûn? Yn 2009 ha ik oan Us Jonges meidien.
Dit jier ha ik by de ynformaasjejûn fan
Terpwert west. Baukje fertelde doe dat se
noch ien sochten dy’t it PR-team fersterkje
woe. Ik waard entûsjast en ha my
oanmeld.
Wat fynst it leukste oan it Iepenloftspul?
de gesellige en gemoedlike sfear. Der
binne sawol foar as achter de skermen
in soad minsken dwaande mei it Iepenloftspul.
En allegear wurkje we gear oan
in prachtich resultaat.
Namme: Oebele Harmsma
Leeftyd: 56 jier jong
Wenplak: Menaam
Deistich wurk: Yn it deistich libben wurkje ik yn it
ûnderwiis as direkteur fan De Wingerd yn
Damwâld. De Wingerd is in skoalle foar
learlingen mei in ferstanlike beheining,
soms yn kombinaasje mei in lichaamlike
beheining. Op De Wingerd sitte ûngefear
200 learlingen.
Kommisjelid sûnt: dit jier
Funksje: ik bin ferantwurdlik foar de kommunikaasje
tusken de spilers en regisseur /
kommisje.
Hoe bist begûn? wy wienen oan it silen op it Waad doe’t
Grieteke my frege oft in 'sit' yn de kommisje
ek wat foar my wie.
Wat fynst it leukste oan it Iepenloftspul?
ik bin faak by de repetysjesjûnen. Ik
kin dan folop genietsje fan it spul en de
besieling fan de spilers. It is gewoan in
geweldige belevenis om meimeitsje te kinnen
hoe’t de spilers dwaande binne mei it
toanielspul.
Namme: Janny Epema
Wenplak: Dronryp
Leeftyd: 50 jier
Deistich wurk: wurket as meiwurker soarchadministraasje
by it Afsprakenbureau fan GGZ Friesland
yn Ljouwert.
Kommisjelid sûnt: 2008.
Hoe bist begûn: ik wenne in healjier yn Dronryp doe’t ik
troch Annewiep Bloem (doe de skriuwster)
frege waard oft ik der wat foar fielde om
yn it bestjoer fan it Iepenloftspul Dronryp
te kommen. Eins kaam it wat te betiid
op myn paad. Thús hienen we it drok mei
de ferbouwing fan ús wenning, mar ik
hie der te folle nocht oan om "nee" sizze
te kinnen. Dit jier is myn lêste jier yn it
bestjoer. Ik bin bliid dat ik doe "ja" sein
ha.
Funksje: ik bin yn it bestjoer ferantwurdlik foar de
katering, de omballings en de smink.
Wat fynst it leukste oan it Iepenloftspul?
it is alle jierren wer in boeiend proses,
fan de earste gearkomste nei in skript,
audysje, repetysjes en dan úteinlik de
foarstellings. Hieltyd wer oars, mar alle
kearen wer fantastysk.
Achterste rige: Oebele, Grieteke en Anne, Foarste rige: Grea, Wilma, Linda, Janny en Baukje
Namme: Anne Kingma
Wenplak: Dronryp
Leeftyd: 51 jier
Deistich wurk: sûnt 1985 bin ik eigner fan Drukkerij Emka
yn Dronryp. Wy fersoargje foar in grut
part it drukwurk fan it Iepenloftspul en
allerhanne oar drukwurk út de regio.
Kommisjelid sûnt: 2012
Hoe bist begûn? sûnt 1992 ha ik hast alle jierren meispile
yn it Iepenloftspul. Yn de jierren dat ik
gjin rol hie wie ik wol op in oare wize
belutsen. Fanwegen dy ûnderfining en
belutsenheid waard ik foarich jier troch
de foarsitter frege oft ik de kommisje fersterkje
woe. Dêr ha ik sûnder te twifeljen
ja op sein.
Funksje: foarsitter en ferantwurdlik foar it dekor en
de technyk.
Wat fynst it leukste oan it Iepenloftspul?
yn al die jierren dat ik meispile ha, is der
in soad de revue passeard. In soad minsken
hawwe hert en siel yn de ferskate produksjes
stutsen. Sawol foar, mar foaral ek
achter de skermen. It Iepenloftspul draait
op frijwilligers en al dy minsken koesterje
we enoarm. Sûnder harren kinne we gjin
produksjes delsette mei de omfang en
kwaliteit dy’t we fan de lêste jierren wend
binne.
Namme: Grieteke Althuis
Wenplak: Menaam
Leeftyd: 54 jier
Deistich wurk: ik bin troud, ha twa dochters en wurkje by
de OSG Piter Jelles as ambtlik sekretaris
fan de MeibeslissingsrjochtRied.
Kommisjelid sûnt: febrewaris 2012
Funksje: sekretaris
Wat fynst it leukste oan it Iepenloftspul?
ik wie altyd al in trouwe besiker fan it
Iepenloftspul en fyn it no hiel bysûnder
om fan tichtby mei te meitsjen hoe’t der
meiinoar foar soarge wurdt om prachtich
moaie foarstellings del te setten.
Dêr komt hiel wat by te sjen, mar alle
belutsen minsken binne entûsjast en sette
harren foar mear as 100% yn, geweldich!
Ik bin dêrom ek tige grutsk dat ik diel út
meitsje mei fan it hiele barren.
Namme: Linda Hoekstra
Leeftyd: 45 jier
Wenplak: Dronryp
Deistich wurk: ik wurkje by Ganzinga Schilderwerken BV
dêr’t ik, behalve sa no en dan ferve minge
en ferkeapje yn de winkel, alles doch wat
net direkt mei skilderwurk te krijen hat
lykas de finansjele saken. Dêrneist binne
der in soad dingen dy’t ik leuk fyn om te
dwaan lykas lêze, iten siede en bakke,
films/searjes sjen mei Dirk, fotografearje
en drave (hoewol’t dat de lêste tiid fanwegen
blessueres net sa hurd mear giet).
Kommisjelid sûnt: maaie 2009
Funskje: ponghâlder
Hoe bist begûn? Ik wie op syk nei frijwilligerswurk yn het
doarp, doe’t ik yn de doarpskrante lies dat
it Iepenloftspul in ponghâlder socht. Dat
like my wol wat.
Wat fynst it leukste fan it Iepenloftspul?
It hiele proses fan neat ta in foarstelling
mei alles der op en der oan, de gearwurking
fan alle dissiplines. Want der komt
in soad by te sjen. It is geweldich om te
sjen dat sa’n soad minsken harren alle
jierren wer belangeleas ynsette om der
mei syn allen wat moais fan te meitsjen.
Namme: Wilma van den Berg
Leeftyd: 33 jier
Wenplak: Dronryp
Deistich wurk: sûnt ik 2,5 jaar lyn foar it earst mem
wurden bin, wurkje ik noch 3 dagen yn de
wike by in makelderkantoar yn Frjentsjer.
Ik stypje dêr de makelder op alle gebiet,
fan it útwurkjen fan stikken oant it ûnderhâlden
fan alle klantekontakten.
Kommisjelid sûnt: 2010 ('That's allright momma')
Funksje: ik bin ferantwurdlik foar de kaartferkeap
en de sponsering.
Hoe bist begûn? yn 2008 bin ik yn Dronryp kaam te
wenjen. Ik koe tafallich twa kommisjeleden.
Sy hawwe my frege. It like my in
hiele leuke manier om mear yn it doarp te
integrearjen.
Wat fynst it leukste fan it Iepenloftspul?
ik fyn it hiel leuk om achter de skermen
dwaande te wêzen mei sa’n grut projekt
dat benammen droegen wurdt troch alle
frijwilligers. It is boeiend om te sjen
hoefolle wurk der mei syn allen dien wurdt
om sa’n grutte produksje op tou te setten.
It is alle jierren wer in keunst om alles sa
goed mooglik ferrinne te litten, sadat yn
juny sa'n 3.000 besikers fan de foarstellings
genietsje kinne.
www.iepenloftspuldronryp.nl