2de Sondag na Trinitatis 2013 - Jes 551-3

´n Mens leef nie net van daaglikse brood alleen nie
2 de Sondag na Trinitatis
9 de Junie 2013
“Die genade van die Here Jesus Christus en die liefde van God en die gemeenskap van die
Heilige Gees sal by julle almal wees.“ -2. Kor. 13:13-
1. Kom, almal wat dors is, kom na die water toe, selfs ook dié wat nie geld het nie, kom, koop en
eet; ja, kom, koop sonder geld en sonder om te betaal, wyn en melk. 2. Waarom weeg julle geld afe
vir iets wat nie brood is nie, waarom werk julle vir iets wat nie kan versadig nie? Luister aandagtig
na My, sodat julle kan eet wat goed is en versadig kan word met die beste wat daar is. 3. Gee
aandag en kom na My toe, luister, en julle sal lewe.
Jesaja 55, 1-3
’n Gelykenis: Eendag was daar ’n Godvresende man. Die Gees het hom na die woestyn toe
gelei. Vir 40 dae lank het hy hom van die samelewing onttrek. Sy enigste voedsel was brood. Toe
kom die duiwel, die versoeker na hom toe en sê: “’n Mens leef nie net van brood alleen nie...”
(Deu.8:3) “Kyk na al die gawes wat God geskenk het. Hulle is daar vir jou sodat jy jou lewe in
volheid en met oorgawe kan geniet. Gebruik tog elke minuut wat aan jou gegee word, en maak jou
lewe tog die moeite werd!” En hy het verskeie tydskrifte voor sy voete neergelê: motortydskrifte,
tydskrifte oor eksotiese bestemmings, tydskrifte waarin naakte vrouens in pryk, ’n televisieuitsending
tydskrif, sporttydskrifte, finansiële tydskrifte – aandelebeurse, markverslae - tydskrifte
wat eiendomme adverteer, binnehuisversieringstydskrifte, tydskrifte met interessante idees vir die
tuin, loopbaangerigte tydskrifte wat beloftes vir verskeie beroepe, t.o.v. rykdom en roem inhou....
Daar het baie tydskrifte voor sy voete te lande gekom sodat die koop-gier die man moet beetpak,
sodat die dors en honger na lewe geles kon word. Want: “’n Mens leef nie net van brood alleen
nie.” En die man het teruggekeer huis toe. Hy het deur die tydskrifte begin blaai...
Liewe gemeente! Nee, dis nie ’n verhaal van versoeking soos ons die verhaal van Jesus wie in
die woestyn versoek is nie. Maar die verhaal is tog aan almal van ons bekend.
Hierdie gelykenis weerspieël baie karakters in die Bybel: Dawid wat na lewe hunker en d.m.v.
owerspel met Batseba te pleeg, dink dat hy die lewe ontdek het. Die ryk jong man, wat d.m.v. sy
eerlike lewe en rykdom die lewe probeer vind. Martha wat pligsgetrou in die kombuis werskaf.
Saggeus, die tollenaar. Die Fariseërs, wat dink hulle het die lewe ontdek deur die slaafse
navolging van wette. En nog baie ander ook. “’n Mens leef nie net van brood alleen nie.” Nogtans
bly almal soekend, die tong bly aan die verhemelte vasgekleef. Sommiges, soos Saggeus, is baie
bewus daarvan. Vir sommiges moet die feit dat hulle soeke na lewe teen die wil van God is, aan
die lig gebring word, soos bv. Dawid. Sommige mense weet nie dat hulle op soek is na die ware
lewe nie, dat hulle honger en dors is, en dit moet aan hulle openbaar gemaak word, soos die ryk
jong man of die Fariseërs.
Ek sien myself in hierdie gelykenis raak. Die duiwel wat ongenooid homself in my lewe
tuismaak, deurdat een na die advertensie my daartoe noop om brood te koop, wat nie die honger
en dors les nie.
“’n Mens leef nie net van brood alleen nie!” Dit is waar. Die duiwel maak Jesus se Woord sy eie,
’n Woord wat ook na die Ou Testament verwys. Die duiwel stel ’n alternatief voor. Lewe word
gevind deur middel van al die aanbiedings wat in tydskrifte te vinde is.
Dikwels word ons ook deur hierdie alternatiewe wat die duiwel stel verblind en gevange
geneem. Ons tel ons geld sodat ons lewe kan koop, ons dors na ware lewe te les: motor, huis,
kleding, vakansie. Ons spaar geld sodat ons ’n lewe vir môre kan koop, die honger na lewe te stil:
pensioen, woonhuise, beleggings. Ons gee alles, werk hard, spaar en samel deur die bitter
verdienste in, sodat ons die lewe in oorvloed en ten volle kan geniet. Ons herken dat ons mense
wat honger ly en dors is. Ons weet dat die lewe meer is as net brood: “Die mens leef nie net van
brood alleen nie!”
Maar daar, waar ons uitgelewer is aan die alternatiewe van die duiwel, bly ons steeds
soekende. Net soos ’n hert wat dors na vars water, net so smag ons ook na die ware lewe.

Dit is baie goed dat God ons nie alleen in ons soeke los nie, maar dat Hy vir ons ’n Natan stuur,
wat ons op afdraaipaaie en dwaalweë opsoek – soos die geval met Dawid. As Hy ons daarvan
bewus maak dat ons aan sekere goed vasklou – soos die ryk jong man. As Hy ons in ons nood
raaksien en vanuit die boom na ons roep en na ons toe kom – soos Saggeus. As hy ons in die
middel van ons werk oproep ons stil te staan, en ons uitnooi om te luister – soos Marta.
Dan begin ons besef. Ons is op soek na lewe. Ons is honger en dors, ons smag daarna. Ons
soek na die lewe in die ware sin van die woord. Brood wat waarlik versadig maak. Water, wat die
dors les.
En Jesaja skenk aan ons vandag hierdie voedsel vir die lewe: 1. Kom, almal wat dors is, kom na
die water toe, selfs ook dié wat nie geld het nie, kom, koop en eet; ja, kom, koop sonder geld en
sonder om te betaal, wyn en melk. 2. Waarom weeg julle geld af vir iets wat nie brood is nie,
waarom werk julle vir iets wat nie kan versadig nie? Luister aandagtig na My, sodat julle kan eet
wat goed is en versadig kan word met die beste wat daar is. 3. Gee aandag en kom na My toe,
luister, en julle sal lewe.”
Die mense van Israel het hulle afgewend van die bron van ware lewe. God het hulle met die
Babiloniese ballingskap gestraf. Daar was hulle van die beloofde land geskei. Hulle was nie net
ver weg van die beloofde land af nie, maar ook van God af. Nou het hulle daar gesit, verlate,
onderdruk, terneergedruk, wanhopig, gestroop van toekomsplanne, sonder hoop. Het God hulle
vergeet? Het Hy Sy belofte laat vaar?
Maar op hierdie afstand, kan die mense die werklike lewe hoor, kan hulle lewe koop, sonder om
daarvoor te betaal. Kom!, so nooi God hulle uit. Luister!, roep Hy uit! Vind lewe in en by My!
“Die mens leef nie net van brood alleen nie, maar hy leef van elke woord wat uit die mond van
God kom!” (Deuteronomium 8:3) Nie net ’n halwe waarheid nie, maar die reine waarheid, alles!
Die mens leef nie net alleen van brood nie, maar ook nie van die verskillende aardes gawes van
God nie. Nie net van daaglikse brood en alles, wat dit behels nie. Maar van God se Woord. Die
Woord van God skenk ons lewe in die ware betekenis van lewe. Hy skenk dit verniet, geen geld
kan dit koop nie!
Teen al die valse alternatiewe, teen die leuen van die duiwel, teen die halwe waarheid wat ons
nie selde nie, maar wel alledaags d.m.v. tydskrifte, die media en ander middele voorgehou word,
laat God sy Woord hoor. Teen die versoeking die lewe in die daaglikse brood en alles wat dit
behels te soek, laat God sy Woord hoor, wat ware, ewige lewe aan ons skenk.
“Waarom weeg julle geld af vir iets wat nie brood is nie, waarom werk julle vir iets wat nie kan
versadig nie?” Ons moet hierdie stelling nie verkeerdelik verstaan nie. Daar is niks mee verkeerd
om jou geld af te weeg (d.w.s. te tel) nie, daarmee te woeker en te werskaf en te spaar nie. Dis nie
verkeerd om ’n motor of ’n huis te besit en vreugde en behae daarin te skep nie. Die huis te
meubileer en huislik in te rig nie. Te ontspan en weer tot verhaal te kom nie, om jouself met iets te
bederf, te reis, op vakansie te gaan nie. God het self ’n rusdag ingestel en dis baie belangrik en
God wil dit ook so hê. Hy skenk ook aan ons Sy gawes sodat ons dit kan gebruik en dit te geniet,
en Hom as die Gewer van alle goeie gawes sal herken en dankbaar te wees vir al Sy gawes. Maar
die lewe bestaan uit meer as net die uiterlike dinge. ’n Oorvloedige, waardevolle, sinvolle en
doeltreffende lewe, is alleen ’n lewe saam met God en van God af. Ware lewe word alleen by God
gevind.
Hy skenk aan ons die lewe deur middel van Sy Woord. Kom, stil julle honger deur My Woord!
Luister!
Hoor ons nog die stem van God as ons rugby, krieket of tennis op TV kyk? Het Hy nog ’n sin in
die familie? Hoor ons nog Sy lewensgewende stem, daar waar ons gemoeid is met voorbereiding
vir die eksamens? Of weerklink die wêreldse beloftes oorverdowend in ons ore? “Hier kan jy lewe
vind – sit maar die stiltetye deur God se Woord te bestudeer opsy, asook Sy diens op Sondae!
Koop met jou swaarverdiende geld die teenswoordige lewe!” Hoor ons nog God se stem hier in die
erediens of tuis tydens boekevat? Of verbreek die gedagtes aan die dag van môre en die
komende week hierdie stiltetye? “Wat wag alles op ons in hierdie komende week, wat hou môre
vir my in? Hoe en waarop kan ek my geld spandeer om lewe te koop?”
Dus “Gee aandag en kom na My toe, luister, en julle sal lewe.” Erken dat jy dors het! Erken dat
jy honger is! Martha, Martha, jy is besorg en verontrus oor baie dinge!” (Luk. 10,41), so roep Jesus
en nooi haar uit om te luister. “Saggeus, maak gou en klim af, want Ek moet vandag in jou huis

ly!” (Luk. 19,5), so verkondig Jesus Sy genade aan Saggeus. Jy, wat honger is vir die lewe, maar
wat so maklik deur die aanbiedinge wat die wêreld verslind word; jy, wat dors is na die lewe en
deur die daaglikse gejaag, die inkopietogte en verkope, heen-en-weer ritse, nie versadig raak nie;
jy, wat deur die valse voedsel wat die wêreld bied, moeg en oorlaai bly staan; jy, wat deur alles
wat die wêreld jou bied voor oë gehou word, na ’n sinvolle lewe smag - 1. Kom, almal wat dors is,
kom na die water toe, selfs ook dié wat nie geld het nie, kom, koop en eet; ja, kom, koop sonder
geld en sonder om te betaal, wyn en melk. 2. Waarom weeg julle geld afe vir iets wat nie brood is
nie, waarom werk julle vir iets wat nie kan versadig nie? Luister aandagtig na My, sodat julle kan
eet wat goed is en versadig kan word met die beste wat daar is. 3. Gee aandag en kom na My toe,
luister, en julle sal lewe.
Hier, tydens die erediens, word jou verlange, jou smagtinge, jou honger en dors na ’n sinvolle,
waardevolle lewe geles. Die pyn wat in jou binneste brand, word genees. God skenk aan jou, hier
tydens hierdie stilte, in die woestyn van jou lewe, Sy lewegewende Woord. Hier kan jy luister en
hoor, en daardeur kry jy ryk voedsel en kan jy jouself aan God se kosbaarhede ryklik lawe, want
God neem jou deur Sy Woord in Sy gemeenskap op.
“Kom na My toe, almal wat uitgeput en oorlaai is, en Ek sal julle rus gee.” (Mat. 11,28), so word
ons met die teksvers vir die week aan Jesus se Woord herinner. God se groot en hartlike
uitnodiging na die lewe in Sy Seun, Jesus Christus. “As iemand dors het, laat hy na My toe kom
en drink!” (Joh. 7,37), so nooi Jesus jou uit. God se uitnodiging word vandag weer opnuut aan jou
uitgereik, soos Johannes in die Openbaring skryf: “Kom!” En elkeen wat dors het, moet kom;
elkeen wat die water van die lewe wil hê, moet dit kom kry, verniet!” (Op. 22,17). Hier, tydens die
erediens, d.m.v. sang, gebed, luister, en proe, word jou honger gestil en jou dors word geles.
Want hier neem God jou weer opnuut in Sy gemeente op, ’n gemeente wat ’n ware, sinvolle lewe
beloof.
Dit is verseker so dat ons van hier af weer ons alledaagse lewe tegemoet gaan. Ons word deur
die Gees na die woestyn gedryf, en daar kan ons versadigde lewe vinnig en maklik uitgedroog
word. Want daar word ons diens aan ons naaste vereis – fisies sowel as geestelik. Dat ons hulle
in hulle liggaamlike nood bystaan. Dat ons hulle ook tydens hulle geestelike nood sal bystaan en
help. Ons sal mense ontmoet, en hulle sal na ons toe kom wat self smagtend en honger is na die
ware brood, en daarmee saam ontvang ons die opdrag om aan hulle die Woord van God te
verkondig. En steeds sal die duiwel, met al sy valse voorwendsel, aanbiedinge en beloftes, ons
probeer van God af weg te lok. Met al sy aantreklike advertensies sal hy alles in sy vermoë doen
om ons aan die wêreld te bind en ons te lei om brood te koop, wat nie versadig maak nie.
Maar al voel ons ook hoe klein en magteloos, hoef ons nooit moed te verloor nie. God laat hom
vind. Hy versterk ons, Hy lawe ons, stil ons honger en les ons dors. Deur Sy Woord skenk Hy ons
ware lewe en maak vir ons die lewe die moeite werd en betekenisvol. “Gee aandag en kom na My
toe, luister, en julle sal lewe.” ’n Moeë, onwelvoeglike lewe, ’n lewe met sinnelose gewoontes,
word deur God se Woord gereinig en met nuwe lewenskrag gevul.
Die vrede van God wat alle verstand te bowe gaan, sal ook oor julle harte en gedagtes die wag
hou in Jesus Christus. Amen
Ds. Helmut Paul
Wittenberg, Suid-Afrika
(vertaling)