Pinkster 2012.pdf - Communitas

Hierdie kan ‘n heerlike geleentheid wees. Dit sal moeite vra, maar as dit
enigsins binne jul vermoë is, doen dit. Kyk na die samestelling van jou
groep. As dit moontlik is, verdeel die kinders in groepe van 10 of minder.
Die idee is om ‘n video te maak. Hulle teken 10 prente en dit word dan as
beeldmateriaal gebruik terwyl die verhaal vertel en opgeneem word. (As
jul regtig nie kan nie - plak dan die prente teen ‘n muur en laat die kinders
die storie vertel.)
Elke groepie van tien moet verkieslik ‘n volwasse leier hê. (Oulike
hoërskoolkinders kan ook gebruik word, veral omdat hulle goed sal wees
met die hantering van ‘n video of selfoon video.)
Vir elke groep is daar ook ‘n inleidende prent nodig wat die video
aankondig. Iets soos: "Pinkster aangebied deur Graad 4's van Doringbaai".
Die laaste "prent" is die krediete. Daarop staan: "Aangebied deur ..." (al
10 kinders en hul leier se name).
Inleiding:
Gee aan elke kind ‘n marshmallow met die opdrag dat hulle dit nie mag
eet nie.
Sing nou twee liedere:
1. Enige bekende lied oor die feit dat ek aan God behoort (soos
"Ek is bly ek ken vir Jesus")
2. "Weet jy nie, weet jy nie jy's ‘n tempel?"
Hulle mag nou die marshmallow eet. Vra dan: "Hoe voel dit om te wag vir
iets lekkers wat moet gebeur? Hoe voel dit om 5 minute te wag? Hoe voel
dit om by die skool te wag tot pouse? Hoe voel dit om ‘n week te wag? En
10 slapies?
Jesus se dissipels moes 50 dae wag vir die Heilige Gees om te kom. Die
woord Pinkster beteken 50 en verwys na die aantal dae nadat Jesus
opgevaar het hemel toe voordat die Heilige Gees uitgestort is.
Julle kan elkeen nog ‘n marshmallow kry wat julle dadelik kan eet en dan
gaan ons iets baie spesiaals doen.
Verhaal:
Ek gaan kortliks vir julle die verhaal van die uitstorting van die Heilige
Gees vertel en dan gaan julle elkeen ‘n deeltjie van die verhaal teken. Ons
gaan julle tekeninge met ‘n videokamera afneem en so gaan elke groep
jul eie Pinkster video maak. Julle moet die verhaal vertel terwyl julle die
prente afneem. (As julle anders besluit het, plak dan die prente chronologies
teen die mure en laat die kinders die verhaal vertel.)
Daar het 10 dinge gebeur:
1. Jesus se tyd op aarde was verby en Hy het voor sy dissipels se oë
opgevaar hemel toe.
2. Net voor Hy opgevaar het, het Hy gesê hulle moet in Jerusalem wag
vir die Heilige Gees .
3. Op Pinksterdag (nadat hulle 50 dae gewag het) was daar skielik ‘n
geweldige wind - maar net die geluid van die wind.
4. Iets wat soos tonge van vuur gelyk het, was op elke dissipel se kop.
5. Die dissipels het in verskillende tale begin praat, tale wat hulle nooit
geleer het nie.
6. ‘n Groot skare het saamgedrom omdat hulle die wind gehoor het.
Hulle was verbaas, want hulle het van verskillende lande afgekom en
kon hoor dat die dissipels in hulle eie taal vir hulle van God se wonderlike
dade vertel.
7. Party mense het gespot en gesê dat die dissipels dronk was, maar
Petrus het tussen hulle gaan staan en gesê: "Ons is nie dronk nie,
maar die Heilige Gees is uitgestort soos God beloof het. Nou kan
julle almal verstaan dat Jesus die Seun van God is wat vir ons sondes
kom sterf het."
8. Die mense het gevra: "Wat moet ons doen?"
9. Petrus het gesê hulle moet in Jesus glo en hulle laat doop. 3 000
mense is daardie dag gedoop.
10. Hulle was nou nuwe mense. Hulle het in Jesus geglo en hulle het
die Heilige Gees in hul lewens gehad. Daarom was hulle lief vir God
en vir ander mense. Hulle wou alles van God leer. Hulle het gereeld
saamgekom om die Here te loof, hulle het nagmaal gehou en baie
saamgebid. Hulle lewens het verander. Hulle het vir almal van Jesus
vertel en so weet ek en jy ook nou van Hom. Ons kan ook ons lewens
vir Jesus gee, met die Heilige Gees vervul word en nuwe mense
wees.

Die kinders gaan teken die volgende prente en lees weer hul gedeelte in
die Bybel.
1. Jesus se hemelvaart - Handelinge 1:9-11
2. Die dissipels wag in Jerusalem - Lukas 24:49, 52, 53
3. Stormwind - Handelinge 2:1-2
4. Vuur - Handelinge 2: 3
5. Tale - Handelinge 2: 4
6. ‘n Groot skare - Handelinge 2:5-9 en 12-13
7. Petrus se toespraak - Handelinge 2: 14-18
8. Wat moet ons doen? - Handelinge 2: 37-39
9. 3 000 is gedoop - Handelinge 2: 41
10. Nuwe mense - Handelinge 2: 42
Sodra die prente gereed is, kan julle begin oefen en werk aan die video.
Fokus elke keer met die kamera op die prent en lees of vertel daardie deel
van die verhaal. (Kinders kan ook kreatief wees en bv. 'n temaliedjie kies
en saamsing of nog byklanke maak, ens.)
Moenie vergeet om aan die begin die titel en aan die einde die krediete
af te neem nie.
Die video's kan vir mekaar gewys word, op ‘n gemeente se webblad
geplaas word, vir die ouers voorgespeel word of hoe julle ook al goed
dink om dit te gebruik.
* Bybels
* Marshmallows
* Papier en kryte
* Prestik (wondergom)
* Video kamera/selfoon met goeie video
kamera
* Fasiliteite om die videos te kyk